देउवा निवासमा ४ दलको मनथन

काठमाडौं । नेपाली कांग्रेसका सभापति शेरबहादुर देउवा निवास बूढानीलकण्ठमा सरकारको कार्यशैलीका विषयमा छलफल गर्न प्रतिपक्ष दलहरूको जमघट भएको छ । सत्ता गठबन्धनको एकीकृत समाजवादीका अध्यक्ष माधवकुमार नेपालसमेत सहभागी भएपछि चाँसोकासाथ हेरिएको छ ।

मधेस प्रदेशमा सरकार गठनबारे छलफल गर्न भेला भएको भनिए पनि केन्द्रीय सरकारको काम कारबाहीबारे बैठकमा छलफल भएको स्रोतको दावी छ । बैठकमा नेपालसहित जनता समाजवादी पार्टी नेपालका अध्यक्ष उपेन्द्र यादव र लोकतान्त्रिक समाजवादी पार्टीका अध्यक्ष महन्थ ठाकुर पनि सहभागी भएका थिए। यादवले मधेस सरकार गठनका लागि कांग्रेस सभापति देउवाको सहयोग मागेका थिए।

यसअघि पनि यादवले लोसपा अध्यक्ष ठाकुरलाई भेटेर उक्त आग्रह गरेका थिए। सत्ता गठबन्धन फोडेर माधव नेपालको सहयोगमा नयाँ गठबन्धन निर्माण गर्न चलखेल गरेको आरोप लागेपछि प्रधानमन्त्री पुष्पकमल दाहालले यादवलाई सरकारबाट बाहिर हुत्याएदिएका हुन । त्यसपछि स्वास्थ्यमन्त्रीसमेत रहेका यादव गठबन्धनबाट बाहिरिएका थिए ।