- १५ जेष्ठ २०८३, शुक्रबार / May 29, 2026
भक्तपुर, २८ जेठ । भक्तपुरको मध्यपुर थिमि नगरपालिकाले जनप्रतिनिधिहरूको तीन वर्षे कार्यकालमा भएका प्रगतिबारे सार्वजनिक जानकारी गराएको छ। मध्यपुर सञ्चार समाजद्वारा आयोजित कार्यक्रममा मेयर सुरेन्द्र श्रेष्ठले १५ पृष्ठ लामो प्रतिवेदन प्रस्तुत गर्दै नगरपालिकाको प्रगतिबारे विवरण दिएका हुन् ।
प्रतिवेदनमा नगरका भौतिक पूर्वाधार, शिक्षा, वातावरण, संस्कृति संरक्षण, सामाजिक विकास, बजेट कार्यान्वयनजस्ता विविध क्षेत्रको समेटिएको छ। मेयर श्रेष्ठले प्रगतिहरू श्रेणीगत रूपमा पढेर सुनाएका थिए ।
पत्रकारहरूको प्रश्नमा मेयर श्रेष्ठले निलबाराही ऐतिहासिक क्षेत्रको संरक्षणका लागि नगरपालिकाले पनि काम गरिरहेको जानकारी दिए । तर, केही अभियन्ताहरूले स्वेच्छाचारी रूपमा चन्दा संकलन, श्रमदान कार्यक्रम संचालन गरेको भन्दै असन्तुष्टि व्यक्त गरे । उनका अनुसार नगरपालिकालाई जानकारी वा अनुमति नदिई गरिएका कामहरूप्रति नगरपालिका चुप लागिरहन नसक्ने बताए ।
“मिशन ८४” भनेर केही अभियन्ताहरूले आगामी २०८४ को स्थानीय चुनावमा मूल्यांकन गर्ने चेतावनी दिएको सन्दर्भमा मेयर श्रेष्ठले सहजताका साथ जवाफ फर्काउँदै भने: “संविधानले सबैलाई चुनाव लड्ने अधिकार दिएको छ । २०८४ मा हेरौँला भने, हामी पनि तयार छौँ ।”
कार्यक्रममा उपमेयर विजयकृष्ण श्रेष्ठ र विभिन्न वडाका अध्यक्षहरूले पत्रकारहरूको प्रश्नको जवाफ दिएका थिए। कार्यक्रमको अध्यक्षता मध्यपुर सञ्चार समाजका अध्यक्ष चन्द्रकृष्ण श्रेष्ठ (गोपाल) ले गरेका थिए।
