- २२ जेष्ठ २०८३, शुक्रबार / Jun 5, 2026
काठमाडौँ, ५ जेठ । नागरिक उन्मुक्ति पार्टीका संरक्षक रेशम चौधरीलाई थुनाउने प्रक्रिया अघि बढाएका सर्वोच्च अदालतका शाखा अधिकृत महिमान सिंह विष्टलाई काठमाडौँ जिल्ला अदालतले १ लाख रुपैयाँ धरौटीमा रिहा गर्न आदेश दिएको छ।
अदालतका सूचना अधिकारी दीपककुमार श्रेष्ठका अनुसार न्यायाधीश दिनबन्धु बरालको इजलासले विष्टलाई धरौटीमा छाड्ने आदेश दिएको हो। विष्टले प्रहरी कार्यालयलाई पत्र पठाई चौधरीलाई पक्राउ गरी कारागार चलान गर्न निर्देशन दिएका थिए।
सोही पत्र लिएर उनी स्वयं जिल्ला प्रहरी परिसर, काठमाडौँ पुगेका थिए। उक्त पत्रको आधारमा चौधरीलाई केही घण्टा जेल चलान पनि गरिएको थियो। तर पछि सर्वोच्च अदालतले पत्र आधिकारिक नभएको स्पष्ट गरेपछि चौधरीलाई रिहा गरिएको थियो। यथार्थ बाहिरिएपछि विष्ट पक्राउमा परेका थिए।
