हिलेमा आजदेखि खाना महोत्सव

धनकुटा । धनकुटाको व्यापारिक केन्द्र हिले बजारमा पाँच दिने तेस्रो खाना महोत्सव सुरु भएको छ । पर्यटन प्रवर्द्धनको माध्यमबाट आर्थिक गतिविधि बढाउने उद्देश्यले महोत्सव सुरु भएको हो । ‘रैथाने कला संस्कृति परिकारको संरक्षण, आन्तरिक तथा बाह्य पर्यटकको प्रवर्द्धन’ भन्ने मूल नाराका साथ स्थानीय अर्गानिक मौलिक खानाको परिकार राखिने भएको हो ।

‘आर्थिक मन्दिको समयमा आन्तरिक तथा बाह्य पर्यटकको चहलपहल गराएर आर्थिक गतिविधिलाई चलायमान गराउन महोत्सव आयोजना गरिएको हिले पर्यटन प्रवर्द्धन तथा पूर्वाधार विकास संस्थाका अध्यक्ष खगेन्द्र विष्टले बताए ।धनकुटा नगरपालिका–१ हिलेमा हुने महोत्सवमा कोदो, फापर र मकैको ढिँडो, कोदो र फापरको रोटी, गुन्द्रुकको

अचार, सेलरोटी, कोदोको छ्याङ, हिलेको तोङ्गबा, सुकुटीलगायत स्थानीयस्तरमा पाइने मौलिक परिकारको स्टल रहेका छन् ।पाहुनाका लागि हिले आसपासका पर्यटकीयस्थल समेटेर चार हजार छ सय रुपैयाँ बराबरको भ्रमणको प्याकेज मिलाइएको वडा नं १ का वडाध्यक्ष वङ्दा तामाङले बताए । महोत्सवमा ३० हजार पर्यटक भित्राएर एक करोड २५ लाख बराबरको आर्थिक कारोबार गर्ने लक्ष्य राखिएको छ ।