- २८ भाद्र २०८३, आईतवार / Sep 13, 2026
काठमाडौं, १३ । एमाले र नेकपाबीच भएको सत्ता साझेदारीसम्बन्धी तीन बुँदे सहमतिअनुसार कर्णाली प्रदेशमा नयाँ सरकार गठन प्रक्रिया सुरु भएको छ । सोही सहमतिअनुसार नेकपाका मङ्गलबहादुर शाही कर्णाली प्रदेशको मुख्यमन्त्री नियुक्त भएका छन् ।
प्रदेश प्रमुख यज्ञराज जोशीले नेपालको संविधानको धारा १६८ को उपधारा (२) बमोजिम शाहीलाई मुख्यमन्त्रीमा नियुक्त गरेको प्रदेश प्रमुख कार्यालयले जनाएको छ । नवनियुक्त मुख्यमन्त्री शाहीले बुधबार पद तथा गोपनीयताको शपथ ग्रहण गरेका छन् ।
एमाले र नेकपाबीच साउन ९ गते भएको सत्ता सहमतिअनुसार कोशी, बागमती र लुम्बिनी प्रदेशमा एमाले तथा कर्णाली र सुदूरपश्चिम प्रदेशमा नेकपाले सरकारको नेतृत्व गर्ने सहमति भएको थियो । कर्णालीमा नयाँ सरकार गठन भए पनि अन्य प्रदेशमा सरकार गठन प्रक्रिया अझै जारी रहेको छ ।
मुख्यमन्त्री शाहीलाई नेकपाका १४ र सत्ता साझेदार एमालेका १० गरी २४ जना प्रदेशसभा सदस्यको समर्थन प्राप्त छ । ४० सदस्यीय कर्णाली प्रदेशसभामा सरकार गठनका लागि २१ सांसदको समर्थन आवश्यक पर्छ ।
कर्णाली प्रदेश स्थापना भएयता महेन्द्रबहादुर शाही, जीवनबहादुर शाही, राजकुमार शर्मा र यामलाल कँडेलपछि मङ्गलबहादुर शाही पाँचौँ मुख्यमन्त्री बनेका छन् ।
