- १४ श्रावण २०८३, बिहीबार / Jul 30, 2026
मुख्य बुँदा
सुनसरी घटनाको नैतिक जिम्मेवारी सरकारले लिनुपर्ने एमालेको माग।
प्रधानमन्त्री र गृहमन्त्रीको राजीनामा माग।
पद्मा अर्यालद्वारा सरकारमाथि शान्ति सुरक्षा कायम गर्न नसकेको आरोप।
ओमप्रकाश मेहताप्रति श्रद्धाञ्जली र घाइतेको निःशुल्क उपचारको माग।
बाढीपीडित तथा सुकुमवासी व्यवस्थापनमा सरकारको आलोचना।
काठमाडौं, १४ साउन । नेकपा (एमाले) ले मुलुकमा शान्ति सुरक्षा कायम गर्न तथा नागरिकको जिउधनको रक्षा गर्न सरकार पूर्ण रूपमा असफल भएको आरोप लगाउँदै प्रधानमन्त्री र गृहमन्त्रीको राजीनामा माग गरेको छ।
प्रतिनिधि सभाको बिहीबार बसेको बैठकको विशेष समयमा बोल्दै एमाले संसदीय दलकी उपनेता पद्मा अर्याल ले सुनसरीमा हालै भएको दुःखद घटनाको नैतिक जिम्मेवारी सरकारले लिनुपर्ने बताइन्। उनले नागरिकको ज्यान गएको घटनामा प्रधानमन्त्री र गृहमन्त्रीले तत्काल राजीनामा दिनुपर्ने माग राखिन्।
अर्यालले विगतमा यस्तै घटनामा तत्कालीन सरकारलाई दोष लगाउँदै राजीनामा माग्नेहरू नै अहिले सत्तामा रहेको स्मरण गराउँदै वर्तमान सरकारले पनि समान नैतिक जिम्मेवारी लिनुपर्ने धारणा व्यक्त गरिन्।
उनले भनिन्, “काठमाडौंमा गोली चल्दा र मान्छे मर्दा प्रधानमन्त्री र गृहमन्त्रीले जवाफदेहिता लिनुपर्छ भन्नेहरू आज सुनसरीमा नागरिकको ज्यान जाँदा किन मौन हुनुहुन्छ? प्रधानमन्त्रीको पद सिंहदरबार सजाउनका लागि मात्र होइन। देशमा अशान्ति हुँदा र जनता पीडामा पर्दा नेतृत्वले जनताको बीचमा गएर संवाद गर्नुपर्छ। हाम्रा पूर्खाको बलिदानले जोगिएको यो देशको विरासत कमजोर बनाउने हक कसैलाई छैन।”
अर्यालले सरकारले परिस्थिति नियन्त्रण गर्न संयम अपनाउनुको सट्टा त्रास सिर्जना गरी अवस्थालाई झन् उत्तेजित बनाएको आरोप लगाइन्। उनले सुनसरी घटनामा ज्यान गुमाएका ओमप्रकाश मेहता प्रति श्रद्धाञ्जली व्यक्त गर्दै घाइतेहरूको निःशुल्क तथा प्रभावकारी उपचारको व्यवस्था गर्न सरकारसँग माग गरिन्।
उनले मुलुक संकटमा रहेका बेला प्रधानमन्त्री जनताका समस्याप्रति बेखबर रहेको आरोप पनि लगाइन्। विगत दुई महिनादेखि संसदमा उठाइएका प्रश्नहरूको प्रधानमन्त्रीबाट अझै सन्तोषजनक जवाफ नआएको उल्लेख गर्दै उनले संसदमा व्यक्त भएका आपत्तिजनक अभिव्यक्तिहरू सच्याउनुपर्ने आवश्यकता औँल्याइन्।
यसैगरी, अर्यालले बाढी तथा पहिरो पीडितहरूको राहत, उद्धार र पुनःस्थापनामा सरकारले अपेक्षित गति देखाउन नसकेको भन्दै असन्तुष्टि व्यक्त गरिन्। सुकुमवासी व्यवस्थापनका नाममा होल्डिङ सेन्टरमा राखेर पछि अमानवीय ढंगले हटाउने कार्य भएको आरोप लगाउँदै उनले सरकारको कार्यशैलीलाई गैरजिम्मेवार र असंवेदनशील भएको टिप्पणी गरिन्।
एमालेले सरकार नागरिकको सुरक्षा, विपद् व्यवस्थापन तथा सुशासन कायम गर्न असफल भएको दाबी गर्दै प्रधानमन्त्री र गृहमन्त्रीले नैतिक जिम्मेवारी स्वीकार गरी पदबाट राजीनामा दिनुपर्ने माग संसदमार्फत पुनः दोहोर्याएको छ।
