काठमाण्डौ उपत्यकासहित देशभर वर्षाको क्रम जारी, केही क्षेत्रमा चट्याङ्ग र हावाहुरीको सम्भावना

काठमाण्डौ । काठमाण्डौ उपत्यकासहित देशका विभिन्न ठाउँमा विहानैदेखि झरी परिरहेको छ। पछिल्लो एक घण्टामा सर्लाहीमा १२.४ मिलिमिटर वर्षा मापन गरिएको छ भने कोशी, मधेस, बागमती, गण्डकी र लुम्बिनी प्रदेशका थुप्रै स्थानमा पानी परेको छ।

मौसम पूर्वानुमान महाशाखाका अनुसार दिनभर देशका विभिन्न स्थानमा पानी पर्ने र रोकिने क्रम चलिरहनेछ। कोशी र लुम्बिनी प्रदेश तथा देशका पहाडी भूभागका केही स्थानहरूमा चट्याङ्ग र हावाहुरीसहित हल्कादेखि मध्यम वर्षाको सम्भावना रहेको छ।

आज दिउँसो देशभरको मौसम आंशिकदेखि सामान्य बदली रहने अनुमान गरिएको छ। त्यस्तै, हिमाली क्षेत्रमा हल्का हिमपातको सम्भावना पनि रहेको छ। यो मौसम प्रणाली भोलि र पर्सिसम्म जारी रहने महाशाखाले जनाएको छ।