- २३ बैशाख २०८३, बुधबार / May 6, 2026
झापा, ९ भदौ । चालु आर्थिक वर्ष २०८२/८३ को पहिलो महिना साउनमा काँकरभिट्टा नाकाबाट आयात र निर्यात दुबै घटेका छन् ।
मेची भन्सार कार्यालयका अनुसार साउन महिनामा तीन अर्ब ६९ करोड ४० लाख मूल्य बराबरको वस्तु आयात भएको छ, जुन अघिल्लो वर्षको सोही अवधिभन्दा १९ करोड दुई लाखले कम हो । सूचना अधिकारी एवम् भन्सार अधिकृत ईश्वरकुमार हुमागाईंका अनुसार गत आव २०८१/८२ को सोही अवधिमा तीन अर्ब ८८ करोड ४३ लाख बराबरको वस्तु आयात भएको थियो ।
निर्याततर्फ पनि घटावट देखिएको छ । चालु आवको साउनमा एक अर्ब ५४ करोड २८ लाख बराबरको सामान विभिन्न मुलुक निर्यात भएको हो । गत वर्षको साउनमा भने एक अर्ब ८० करोड ८२ लाख बराबरको सामान निर्यात भएको थियो ।
तर आयात र निर्यात दुवै घटे पनि राजस्व भने बढेको छ । कार्यालयका अनुसार चालु आवको साउन महिनामा एक अर्ब २६ करोड ५० लाख राजस्व संकलन भएको छ, जुन गत आवको सोही अवधिभन्दा १५ करोड १८ लाख बढी हो ।
