- ३१ भाद्र २०८३, बुधबार / Sep 16, 2026
सुर्खेत, १८ चैत २०८१ । मध्यपश्चिम विश्वविद्यालय (एमयू) मा स्वतन्त्र विद्यार्थी युनियन (स्ववियु) को नयाँ नेतृत्व चयनका लागि मतदान सुरु भएको छ। निर्वाचन अधिकृत खगेन्द्र अधिकारीका अनुसार मतदान साँझ ५ बजेसम्म चल्नेछ, तर आन्तरिक तयारीमा ढिलाइले तोकिएको समयभन्दा केही घण्टा ढिलो सुरु भएको छ।
६ वर्षपछि हुन लागेको यो स्ववियु निर्वाचनमा ४,३८३ मतदाता सहभागी छन्। विद्यार्थीहरू उत्साहपूर्वक मतदानमा सरिक भएका छन्। यसअघि पटक-पटक निर्वाचन मिति तोकिए पनि उच्च अदालतमा रिट परेकाले स्थगित हुँदै आएको थियो। निर्वाचनबाट अध्यक्ष, सचिव, कोषाध्यक्षसहित १० जना प्रत्यक्ष र ९ जना समानुपातिक गरी १९ सदस्यीय कार्यसमिति चयन हुनेछ।
अध्यक्ष पदमा ७ भ्रातृ संगठन र १ स्वतन्त्र गरी ८ जनाले उम्मेदवारी दिएका छन्। नेविसंघबाट विवेक खड्का, अनेरास्ववियुबाट जगतजंग शाही, अखिल (क्रान्तिकारी) बाट प्रकाश विक, राष्ट्रिय प्रजातान्त्रिक विद्यार्थी संगठनबाट विकल्प वली, नेपाल क्रान्तिकारी विद्यार्थी संघबाट अस्मिता सुनार, अखिल नेपाल विद्यार्थी युनियन (समाजवादी) बाट चीनबहादुर सहकारी, अखिल नेपाल राष्ट्रिय स्वतन्त्र विद्यार्थी युनियन (हैठी) बाट लेलिनकुमार रेग्मी र स्वतन्त्र उम्मेदवार मिलन बिसी प्रतिस्पर्धामा छन्।
