- ३० श्रावण २०८३, शनिबार / Aug 15, 2026
चिया बगानबाहेकका श्रमिकका लागि न्यूनतम तलब १९,५५० रुपैयाँमा पुर्याइयो।
अघिल्लो तलबभन्दा २,२५० रुपैयाँले वृद्धि।
साउन १ गतेदेखि नयाँ दर लागू।
श्रम ऐनअनुसार प्रत्येक दुई आर्थिक वर्षमा तलब पुनः निर्धारण अनिवार्य।
सहमतिमा आधारित निर्णय कार्यान्वयनमा सहज हुने मन्त्रीको भनाइ।
काठमाडौँ, २ साउन । सरकार, रोजगारदाता र ट्रेड युनियनबीचको सहमतिपछि श्रमिकहरूको न्यूनतम पारिश्रमिक १९ हजार ५५० रुपैयाँ निर्धारण गरिएको छ। चिया बगान बाहेकका सबै क्षेत्रमा कार्यरत श्रमिकहरूका लागि यो नयाँ पारिश्रमिक हिजो साउन १ गतेदेखि नै लागू भएको हो।
यो रकम अघिल्लो न्यूनतम तलब १७ हजार ३ सय रुपैयाँभन्दा २ हजार २५० रुपैयाँले बढी हो। चिया बगान क्षेत्रमा कार्यरत श्रमिकहरूको न्यूनतम तलब भने सरोकारवाला निकायहरूसँग थप छलफलपछि मात्र निर्धारण गरिने सरकारको भनाइ छ।
श्रम, रोजगार तथा सामाजिक सुरक्षामन्त्री शरतसिंह भण्डारीले औद्योगिक सम्बन्ध सुमधुर बनाउन तीनै पक्षले लचकता देखाउँदै सहमतिको आधारमा तलब निर्धारण गरेको जानकारी दिनुभयो। उहाँका अनुसार सहमतिमा आधारित निर्णय कार्यान्वयनमा लैजान पनि सहज हुन्छ।
श्रम ऐन, २०७४ अनुसार प्रत्येक दुई आर्थिक वर्षमा श्रमिकको न्यूनतम पारिश्रमिक अनिवार्य रूपमा पुनः निर्धारण गर्नुपर्ने प्रावधान छ। यसपटकको निर्णय पनि सोही कानूनी व्यवस्थाअनुसार गरिएको हो।
