- १२ श्रावण २०८३, मंगलवार / Jul 28, 2026
विराटनगर । जिल्ला प्रशासन कार्यालय, मोरङले जिल्लाभर मेला, महोत्सव, विवाह, पार्टी, चाडपर्व, धार्मिक कार्यक्रम तथा पुराण लगायतका सबै सार्वजनिक तथा सामाजिक कार्यक्रममा डिजे (DJ) बजाउन पूर्ण प्रतिबन्ध लगाएको छ।
सहायक प्रमुख जिल्ला अधिकारी पवनराज कोइरालाद्वारा जारी सूचनामा अर्को सूचना जारी नभएसम्म मोरङ जिल्लाभर कुनै पनि स्थानमा डिजे प्रयोग नगर्न तथा नगराउन निर्देशन दिइएको छ।
प्रशासनले सार्वजनिक शान्ति, सुरक्षा तथा सामाजिक सद्भाव कायम राख्ने उद्देश्यले यस्तो निर्णय गरिएको जनाएको छ।सूचनामा प्रशासनको निर्देशनको अवज्ञा गर्दै कसैले डिजे प्रयोग गरेको वा गराएको पाइएमा प्रचलित कानुनअनुसार कडा कारबाही गरिने स्पष्ट उल्लेख गरिएको छ।
जिल्ला प्रशासन कार्यालयले सबै स्थानीयवासी, आयोजक तथा सरोकारवालालाई प्रशासनको निर्णय पालना गर्न अनुरोध गरेको छ।
