- २२ आश्विन २०८३, बिहीबार / Oct 8, 2026
काठमाडौं, ९ जेठ । राजधानी काठमाडौं भित्रिने प्रमुख नाका नागढुङ्गा–नौबिसे सडकखण्ड दैनिक साढे ४ घण्टा बन्द हुने भएको छ। जेठ १० गतेदेखि २५ गतेसम्म, बिहान १०:३० बजेदेखि दिउँसो ३:०० बजेसम्म सडक पूर्ण रूपमा बन्द गरिने जिल्ला प्रशासन कार्यालय काठमाडौंले जानकारी दिएको छ।
सडक बन्द गरेर नागढुङ्गा–पिपलामोड सडक निर्माणको काम गरिने प्रमुख जिल्ला अधिकारी ऋषिराम तिवारीले बताउनुभयो। यसअघि रातिको समयमा निर्माण कार्य हुँदै आएकोमा अबदेखि दिनको समयमा सडक बन्द गरिने भएको हो।
सडक निर्माण कार्य नारायणगढ–मुग्लिन सडक योजना-पूर्वी खण्ड) अन्तर्गत भइरहेको हो। यस अवधिमा काठमाडौंबाट बाहिरिने सवारी साधन नागढुङ्गामा र नौबिसेतर्फबाट आउने सवारी साधन खानीखोलामा रोकिने सूचनामा उल्लेख गरिएको छ।
यात्रु र सवारी चालकलाई धार्के–सितापाइला तथा टोखा–छहरे–त्रिशूली–गल्छी सडक वैकल्पिक मार्गको रूपमा प्रयोग गर्न अनुरोध गरिएको छ। प्रशासनले सर्वसाधारण, यात्रु, यातायात व्यवसायी र निर्माण कार्यमा संलग्न निकायहरूसँग सहकार्य गरी निर्माण कार्य समयमै सम्पन्न गर्ने लक्ष्य लिएको जनाएको छ।
