- १५ जेष्ठ २०८३, शुक्रबार / May 29, 2026
काठमाडौँ, १५ साउन । नागरिक उन्मुक्ति पार्टी (नाउपा) का अध्यक्ष रञ्जिता श्रेष्ठ चौधरीलाई पार्टीको अध्यक्ष पदसहित साधारण सदस्यबाट समेत हटाइएको छ। संस्थापक नेता रेशम चौधरी पक्षधर समूहले बुधबार सम्पन्न राष्ट्रिय भेलाबाट उक्त निर्णय सार्वजनिक गरेको हो।
यसअघि मंगलबार पार्टीको निर्वाचन एवम् अनुशासन आयोगले श्रेष्ठमाथि कारबाही गर्ने निर्णय गरिसकेको थियो। त्यसको दोस्रो दिन बिहीबार आयोजित राष्ट्रिय भेलाले थप कडा कदम चाल्दै श्रेष्ठलाई पार्टीबाटै निष्कासन गरेको हो।
श्रेष्ठमाथि पार्टीको विधान विपरीत कार्य गरेकाले कारबाही गरिएको जनाइएको छ। विशेषतः अध्यक्षले पटकपटक बैठक नबोलाएको, कुनै विषयमा स्पष्टीकरण नदिएको, कार्यवाहक अध्यक्ष तोकेको र पोखराको लिचीबारी प्रकरणमा संलग्न भएको आरोप उनीमाथि लगाइएको छ।
पोखराको बाटुलेचौरस्थित लिचीबारी जग्गा हिनामिनासँग जोडिएकी अध्यक्ष श्रेष्ठले पछिल्लोपटक शिव बास्तोलालाई कार्यवाहक अध्यक्ष नियुक्त गरेपछि पार्टीभित्रको विवाद सतहमा आएको थियो। यही विवाद चुलिँदै जाँदा अन्ततः अध्यक्षसमेत नरहने गरी पार्टीबाटै हटाउने निर्णयमा पुगिएको हो।
पार्टीको नेतृत्वबाट श्रेष्ठ बाहिरिएसँगै अब पार्टीको आन्तरिक शक्ति सन्तुलन, वैधानिकता र आगामी रणनीति कस्तो बन्छ भन्ने चासो थपिएको छ।
