- २८ श्रावण २०८३, बिहीबार / Aug 13, 2026
काठमाडाैं, १० असार । कतारस्थित अमेरिकी सैन्य अड्डामा इरानले मिसाइल प्रहार गरेपछि त्यसको प्रभाव नेपालसम्म परेको छ। कतार जान तयारी अवस्थामा रहेका ५०० भन्दा बढी नेपाली यात्रु त्रिभुवन अन्तर्राष्ट्रिय विमानस्थलमा बिचल्लीमा परेका छन्।
नेपाल एयरलायन्स र हिमालयन एयरलायन्समार्फत कतार जाने उडान सोमबार राति सुरक्षा कारण देखाउँदै अन्तिम समयमा रद्द गरिएको थियो। यात्रुहरूले रातभर विमानस्थलमै बस्नुपरेको छ। मंगलबार बिहान १०:०५ बजेका लागि तय गरिएको कतार एयरवेजको उडान पनि रद्द भएको छ।
विमानस्थलका वरिष्ठ अध्यागमन अधिकृत सुरेश आचार्यका अनुसार, हिमालयन एयरलायन्सले साँझ ६ बजे उडानका लागि यात्रुहरूलाई बोलाएको छ भने नेपाल एयरलायन्सबाट भने अहिलेसम्म स्पष्टता छैन।
यात्रुहरूले एयरलायन्स कम्पनीले उनीहरूको समस्या प्रति ध्यान नदिएको गुनासो गरेका छन्। कतारको नागरिक उड्डयन प्राधिकरणले हवाई यातायात सामान्य अवस्थामा फर्किएको घोषणा गरेपनि कतार जाने उडान अझै शुरु हुन सकेको छैन।
