- ३० श्रावण २०८३, शनिबार / Aug 15, 2026
झापा, २१ जेठ । चालु आर्थिक वर्ष २०८१/८२ को वैशाख महिनासम्ममा काँकडभिट्टा नाकाबाट बङ्गलादेशसँग भएको व्यापारमा नेपालले करिब पाँच अर्ब रुपैयाँ बराबरको सामग्री आयात गरेको छ भने निर्यात ३५ करोड रुपैयाँमा सीमित भएको छ।
नेपाल पारवहन तथा गोदाम व्यवस्था कम्पनी लिमिटेड, काँकडभिट्टा शाखाका प्रमुख सुवास पाण्डेयका अनुसार बङ्गलादेशबाट सबैभन्दा धेरै अप्रशोधित जुट (र अफिनिश्ड ज्यूट) आयात गरिएको छ, जसको मूल्य १ अर्ब ७८ करोड ४२ लाख रुपैयाँ बराबर रहेको छ।
त्यसैगरी ब्याट्री, पोल्ट्री फिड सप्लिमेन्ट, कस्मेटिक सामग्री, हाइड्रोजन प्याराअक्साइड, जुट यार्न, विद्युतीय उपकरण, औषधि, आलु, कागज, सिसा तथा खाद्य तथा पेय पदार्थसमेत बङ्गलादेशबाट आयात भएका छन्।
नेपालबाट बङ्गलादेश निर्यात हुने वस्तुहरूमा प्रमुख रूपमा ३० करोड २७ लाख ७९ हजार रुपैयाँ बराबरको खुदो पर्दछ। त्यस्तै गरी जडीबुटी, जनावरको आहार (एनिमल फिड), र केही घरेलु सामग्रीहरू पनि निर्यात गरिएको शाखा प्रमुख पाण्डेयले जानकारी दिए।
नेपाल–बङ्गलादेश व्यापार घाटाको अवस्था यस आँकडाबाट स्पष्ट देखिएको छ। नेपालले व्यापार सन्तुलन कायम गर्न उत्पादनमूलक निर्यातमा ध्यान दिनुपर्ने विश्लेषकहरू बताउँछन्।
