- १५ जेष्ठ २०८३, शुक्रबार / May 29, 2026
काठमाडौँ, ५ साउन । नेपालमा बालविवाहको दर अझै पनि उच्च रहेको सरकारी तथ्याङ्कले देखाएको छ। राष्ट्रिय बाल अधिकार परिषद्को बालबालिकासम्बन्धी राष्ट्रिय प्रतिवेदन २०८१ अनुसार प्रत्येक वर्ष ५४ हजारभन्दा धेरै बालबालिकाले १८ वर्षभन्दा कम उमेरमै विवाह गर्ने गरेका छन्।
परिषद्का सूचना अधिकारी रामबहादुर चन्दले आज प्रतिनिधिसभाको महिला तथा सामाजिक मामिला समितिको बैठकमा प्रस्तुत गरेको प्रतिवेदनमा उल्लेख छ कि बालविवाह गर्ने बालबालिकामध्ये करिब ७ प्रतिशत १० देखि १४ वर्षका उमेर समूहमा पर्ने गरेका छन्।
त्यसैगरी, बालबालिकाको स्वास्थ्यसम्बन्धी तथ्याङ्क पनि चिन्ताजनक रहेको छ। अधिकारी चन्दले पाँच वर्षमुनिका १९ प्रतिशत बालबालिकाको तौल सामान्यभन्दा कम रहेको जानकारी दिनुभयो।
बालविवाह र बालबालिकाको स्वास्थ्य अवस्थाले मुलुकको सामाजिक र आर्थिक विकासमा ठूलो प्रभाव पार्ने भएकाले यस विषयमा अझै सक्रिय कदम चाल्न आवश्यक रहेको प्रतिवेदनमा सुझाव दिइएको छ।
