- ७ भाद्र २०८३, आईतवार / Aug 23, 2026
काठमाडौँ, १६ साउन । नेपाल आयल निगमले बजारमा एलपीजी ग्यासको अभाव नरहेको स्पष्ट पार्दै आपूर्ति सहज बनाउन सबै ग्यास वितरकलाई आवश्यक निर्देशन दिएको छ।
शनिबार जारी गरिएको विज्ञप्तिमा निगमले १४ दशमलव २ किलो क्षमताको घरायसी एलपीजी ग्यासको नियमित आपूर्ति भइरहेको जनाएको छ।
बजारमा ग्यास अभाव भएको भन्ने समाचारप्रति गम्भीर ध्यानाकर्षण भएको उल्लेख गर्दै निगमले उपभोक्तालाई आवश्यकताअनुसार मात्रै ग्यास खरिद गर्न र अनावश्यक रूपमा मौज्दात नगर्न आग्रह गरेको छ।
निगमका अनुसार असार ३१ गतेको निर्णयअनुसार १४ दशमलव २ किलो क्षमताको ग्यास सिलिन्डरको बिक्री–वितरण व्यवस्थित गरिएको छ भने दैनिक मागअनुसार निरन्तर ग्यास आपूर्ति भइरहेको छ।
घरायसी उपभोक्तालाई प्राथमिकता दिँदै बिक्री–वितरण गर्न निगमले ग्यास विक्रेतालाई खरिदकर्ताको नाम, ठेगाना र सम्पर्क नम्बर अभिलेख राखेर पारदर्शी रूपमा ग्यास वितरण गर्न निर्देशन दिएको छ।
यस्तै, ग्यास उपलब्ध नभएको अवस्थामा कार्यालय समयभित्र नेपाल आयल निगमको हटलाइन नम्बर ०१–५४१९१०२ मा सम्पर्क गर्न उपभोक्तालाई अनुरोध गरिएको छ।
निगमले एलपीजी ग्यासको आयात, ढुवानी र बिक्री–वितरण नियमित रूपमा भइरहेको जनाउँदै कृत्रिम अभाव सिर्जना हुने गरी अनावश्यक भण्डारण नगर्न र आवश्यकताअनुसार मात्रै ग्यास खरिद गर्न सबै उपभोक्तासँग आग्रह गरेको छ।
