- २२ भाद्र २०८३, सोमबार / Sep 7, 2026
काठमाडौं, ५ पुष । नेपाल राष्ट्र बैङ्कले कर्मचारी सुरक्षण कोषमा रहेको १ अर्ब २० करोड रुपैयाँ बराबरको रकम बैङ्क तथा वित्तीय संस्थामा लगानी गर्ने निर्णय गरेको छ। केन्द्रीय बैङ्कले सूचना प्रकाशित गर्दै मुद्दती निक्षेपका रूपमा उक्त रकम लगानी गर्न इच्छुक बैङ्क तथा वित्तीय संस्थालाई पर्सिसम्म आवेदन दिन आग्रह गरेको हो।
सूचनाअनुसार राष्ट्र बैङ्कले ‘क’ वर्गका वाणिज्य बैङ्कमा ९६ करोड रुपैयाँ, ‘ख’ वर्गका विकास बैङ्कमा १८ करोड रुपैयाँ र ‘ग’ वर्गका वित्त कम्पनीमा ६ करोड रुपैयाँ बराबरको रकम लगानी गर्नेछ। इच्छुक संस्थाले आफूले लिन चाहेको रकम र प्रस्तावित ब्याजदर समेत उल्लेख गरी आवेदन पेश गर्नुपर्नेछ।
लगानीका लागि बैङ्क तथा वित्तीय संस्था कम्तीमा दुई वर्षदेखि सञ्चालनमा आएको हुनुपर्ने, न्यूनतम कूल पूँजीकोष कायम रहेको, कूल कर्जा–सापटी अनुपात ८ प्रतिशतभन्दा बढी नभएको तथा खुद् निष्क्रिय कर्जा अनुपात ३ प्रतिशत ननाघेको हुनुपर्ने सर्त तोकिएको छ।
राष्ट्र बैङ्कले तय गरेका मापदण्ड पूरा गर्ने बैङ्क तथा वित्तीय संस्थामार्फत कर्मचारी सुरक्षण कोषको रकम सुरक्षित र लाभदायक रूपमा परिचालन गर्ने उद्देश्य लिएको जनाएको छ।
