- २३ बैशाख २०८३, बुधबार / May 6, 2026
काठमाडौँ, २९ असोज । आईसीसी टी-२० विश्वकप एसिया तथा इस्ट एसिया प्यासिफिक छनोटअन्तर्गत सुपर सिक्स चरणको महत्वपूर्ण खेलमा आज नेपालले ओमानसँग प्रतिस्पर्धा गर्दैछ । नेपाली समय अनुसार राति ८:४५ बजे सुरु हुने यो खेल नेपाली क्रिकेटको इतिहासकै निर्णायक खेलमध्ये एक मानिएको छ ।
यस खेलमा जित हात पार्न सफल भएमा नेपालले सन् २०२६ मा भारत र श्रीलंकामा संयुक्त रूपमा आयोजना हुने टी-२० विश्वकप खेल्नेछ । नेपालले सुपर सिक्स चरणमा हालसम्म दुई खेल खेलिसकेको छ । जसमा दुबै खेलमा जित हात पारेको छ । यूएई र कतारविरुद्धको दुबै खेल अन्तिम ओभरसम्म पुगेर जितेको नेपालको प्रदर्शन प्रशंसायोग्य रहेको छ ।
यूएईविरुद्ध नेपालले दिएको १४१ रनको लक्ष्य पछ्याउने क्रममा खेल अन्तिम ओभरको अन्तिम बलसम्म पुगेको थियो । अन्तिम ओभरमा दीपेन्द्र सिंह ऐरीले उत्कृष्ट बलिङ गर्दै तीन विकेट लिँदै जित दिलाएका थिए । त्यसैगरी कतारविरुद्धको दोस्रो खेलमा अन्तिम ओभर बलिङ गर्न आएका सन्दीप लामिछानेले उत्कृष्ट प्रदर्शन गर्दै ७ रनले पराजित गर्न सफल भएका थिए ।
आज पनि नेपाल बलियो प्रतिस्पर्धी टिम ओमानसंग भिड्दै । यद्यपि, नेपालले पछिल्ला खेलहरूमा देखाएको फर्मलाई कायम राख्न सके याे खेलबाट नै विश्वकपको यात्रा सुनिश्चित हुने देखिन्छ । सुपर सिक्स चरणमा नेपाल, ओमान, यूएई, जापान, कतार र सामाओ सहभागी छन् । यीमध्ये शीर्ष तीन टिमले सन् २०२६ को टी- २० विश्वकपमा खेल्ने छन् । नेपालले सुपर सिक्सको अन्तिम खेल आगामी शुक्रबार सामाओसँग खेल्नेछ ।
