- २८ श्रावण २०८३, बिहीबार / Aug 13, 2026
काठमाण्डौ, १ पुष । नेपाली राष्ट्रिय महिला क्रिकेट टोलीको मुख्य प्रशिक्षकमा भारतका हर्षल पाठक नियुक्त भएका छन्। नेपाल क्रिकेट सङ्घ (क्यान)ले आगामी महिनादेखि घरेलु मैदानमा आयोजना हुने आइसीसी महिला टी–२० ग्लोबल छनोट प्रतियोगिताका लागि पाठकलाई मुख्य प्रशिक्षकको जिम्मेवारी दिएको जानकारी दिएको हो।
पाठक यसअघि थाइल्यान्डको राष्ट्रिय महिला क्रिकेट टोलीको मुख्य प्रशिक्षकका रूपमा कार्यरत थिए। अन्तर्राष्ट्रिय अनुभवसहित आएका पाठकको नेतृत्वमा नेपाली महिला टोलीले ग्लोबल छनोटमा प्रतिस्पर्धा गर्नेछ।
हाल नेपाली महिला क्रिकेट टोली टी–२० ग्लोबल छनोटको तयारीका लागि प्रशिक्षणमा जुटिरहेको छ। प्रतियोगितामा नेपाल समूह ‘बी’ मा परेको छ, जहाँ नेपालसँगै थाइल्यान्ड, नेदरल्यान्ड्स, स्कटल्यान्ड र जिम्बाबे रहेका छन्।
त्यस्तै समूह ‘ए’ मा भने बङ्गलादेश, आयरल्यान्ड, नामिबिया, पपुवा न्युगिनी र अमेरिका सहभागी छन्।प्रतियोगिताको नियमअनुसार हरेक समूहका शीर्ष तीन टोली सुपर सिक्समा प्रवेश गर्नेछन्।
सुपर सिक्सबाट शीर्ष चार टोलीले इङ्ल्यान्ड र वेल्समा आयोजना हुने महिला टी–२० विश्वकपका लागि स्थान सुरक्षित गर्नेछन्।
