डेढ अर्ब रुपैयाँको नेपाली चिया निर्यात

विराटनगर । नेपालमा उत्पादित करिब डेढ अर्ब रुपैयाँ बराबरको चिया निर्यात भएको छ । मुख्य रुपमा चिया भारत निर्यात हुने गरेको छ ।

पछिल्लो समय समुद्र पारका मुलुकमा चिया लोकप्रिय बन्दै गएको छ । आन्तरिक बजारमा नेपाली चियाको खपत न्यून हुने गरेको छ ।

चालु आर्थिक वर्षको पहिलो चार महिनामा ५७ लाख ७५ हजार किलोभन्दा बढी चिया निर्यात भएको छ ।

साउन, भदौ, असोज र कात्तिक महिनामा एक अर्ब ४९ करोड ४४ लाख ४७ हजार रुपैयाँको चिया निर्यात भएको भन्सार विभागले जनाएको छ ।

नेपाली चिया जर्मनी, फ्रान्स, अस्ट्रेलिया, बेल्जियम, बुल्गेरिया, चेक रिपब्लिक, इटाली, जापान, भारत, चीन, अमेरिका, बेलायतलगायतका देशमा निर्यात हुँदै आएको छ ।