नयाँ वर्ष २०८१ सुरु, शुभकामना आदानप्रदान गरी मनाइँदै

काठमाडौं । नयाँ वर्ष २०८१ आजबाट सुरू भएको छ । हरेक बर्ष वैशाख १ गतेलाई नयाँ वर्षको विशेष दिनका रुपमा मनाइन्छ ।

विक्रम संवतको पात्रोअनुसार आजबाट नयाँ वर्ष सुरु भएको हो। सौर्यमानक हिसाबले वैशाख १ गते नयाँ वर्ष मनाइन्छ भने चन्द्रमानक हिसाबले चैत्र शुक्ल प्रतिपदा तिथिका दिन नयाँ वर्ष मनाइन्छ ।

नयाँ वर्ष एक आपसमा सद्भाव तथा खुशियाली आदानप्रदान गर्दै मनाईन्छ । नयाँ वर्षको अघिल्लो साँझ साथीभाइ, इष्टमित्र भेटघाटसहित रमाइलो गरी वर्षान्त मनाइन्छ । नयाँ वर्षमा धार्मिक आस्था राख्नेहरुले मठमन्दिरमा गई पूजाआजा गर्ने पनि गर्दछन् ।

विगतका कामको समीक्षा गर्दै कमजोरी सुधारेर नयाँ जोश र जाँगरका साथ आफ्नो कर्मक्षेत्रमा लाग्न नयाँ वर्षका अवसरमा प्रण गरिन्छ ।।