- ८ जेष्ठ २०८३, शुक्रबार / May 22, 2026
काठमाडाैं, ८ जेठ । सांसद राजेन्द्रकुमार राईले निर्माण व्यवसायीलाई आफ्नो कार्यशैली सुधार गर्न आग्रह गरेका छन् । पूर्वाधार विकास समितिको बैठकमा बोल्दै उनले व्यवसायीहरूको समग्र छविमा सुधार आवश्यक रहेको बताएका हुन् ।
निर्माण व्यवसायीहरूले सरकारसँग मात्र निर्भर भएर समस्या प्रस्तुत गर्ने प्रवृत्ति हटाउनुपर्ने बताए । व्यवसायिहरूले आफ्ना मुद्दा स्पष्ट तथा व्यवस्थित रूपमा राख्नुपर्ने आवश्यकता रहेकाे उनले बताए । ‘बहाना बनाएर काम रोक्ने प्रवृत्ति अन्त्य गर्नुपर्छ ’ उनले भने ।
सांसद राईले निर्माण क्षेत्रका समस्या बारम्बार एउटै कारण देखाएर दोहोर्याउने प्रवृत्तिप्रति आपत्ति जनाए । उनले तेलको मूल्य बढेको बहानामा काम रोक्ने वा पटक–पटक एउटै विषय उठाउने अभ्यास अब अन्त्य हुनुपर्ने बताए । उनले निर्माण व्यवसायीहरूले आफ्ना समस्यालाई क्रमबद्ध रूपमा १, २, ३, ४ गरेर स्पष्ट रूपमा प्रस्तुत गर्न नसकेको टिप्पणी समेत गरे ।
त्यस्तै उनले निर्माण व्यवसायीहरूको छवि सामान्यतया सकारात्मक नभएको उल्लेख गर्दै त्यसलाई सुधार गरेर विकास निर्माणका कामलाई गति दिनुपर्नेमा जोड दिए । साथै, रोकिएका विकास आयोजनाहरूलाई व्यवहारिक समाधानमार्फत छिटो अघि बढाउन सरकारलाई पनि उनले आग्रह गरेका छन् ।
समग्रमा निर्माण क्षेत्रको सुधार, पारदर्शिता र जिम्मेवारी बढाउन सबै पक्षले सहकार्य गर्नुपर्ने आवश्यकता उनले औँल्याएका छन् ।
