- ३१ असार २०८३, बुधबार / Jul 15, 2026
बागलुङ । कलकल बग्ने निसीखोलाले यतिबेला पर्यटक तानिरहेको छ । अग्ला भिर पहराले घेरेको यो ठाउँ मध्य पहाडी लोकमार्गले जोडेको छ । स–साना ढुंगामाटोले बनेका कलात्मक घरहरुले पर्यटकलाई स्वागत गरिरहेको छ ।
मगर कला सँस्कृतिले भरिएको हुँदा यहाँ आइपुग्ने जोकोही आकर्षित हुने गर्दछन् । अझ यहाँको भाषा, कला र संस्कृतिले त झन् लोकमार्गमा गुड्ने गाडीलाई एकै छिन ठक्क रोक्ने गर्दछ । निसी गाउँको अवलोकन गरेर मात्रै गन्तव्यतर्फ लाग्नेहरु आनन्दित हुने गर्छन् । कृषि र पशुपालनमा आश्रित स्थानीय पछिल्लो समय व्यापार व्यवसायमा सलवलाएका छन् ।
निसीखोला गाउँपालिका–५ मा पर्ने यो गाउँ एक दशक अगाडिसम्म सेवासुविधा थिएन । मगर खाम भाषा बोल्ने स्थानीयको आफ्नै परम्परा छ । विसं २०६४ मा निसी गाउँ मध्यपहाडी लोकमार्गले जोडिए पनि २०६६ सालदेखि गाडी गुड्न थालेका थिए । त्यसभन्दा अगाडि निसीमा कुनै पनि सुविधा थिएन । बजार बुर्तिबाङ आइपुग्न एक दिन पूरै लाग्ने गर्थ्यो ।
अहिले बुर्तिबाङ आउन ४५ मिनेट लाग्छ । सडक यातायातको पहुँचले यस गाउँको मुहार फेरिन थालेको स्थानीयको भनाइ छ । २०७७ सालमा मध्यपहाडी लोकमार्ग कालोपत्रे भएपछि चहलपहल बढेको छ । साना झुपडी रहेका ठाउँमा अहिले ठूला–ठूला पक्की घर बन्न थालेका छन् । मौलिक घरहरु विस्थापित हुँदैगएपछि बुढापाका चिन्तित बनेका छन् ।
