- २६ भाद्र २०८३, शुक्रबार / Sep 11, 2026
फुङलिङ । ताप्लेजुङको हिमाली क्षेत्रमा हिमपात भएको छ । वर्षासँगै उच्च हिमाली क्षेत्र तथा पाथीभरामा बाग्लो हिमपात भएपछि आन्तरिक पर्यटकको लर्को लागेको छ । शुक्रबार साँझ वर्षासँगै पाथीभरा मन्दिरसहितका उच्च क्षेत्रमा हिमपात भएको हो । पाथीभरा मन्दिर क्षेत्रमा हिमपात भइरहेको पाथीभरा क्षेत्र विकास समितिका कर्मचारी राजेन्द्र महतोले बताए । यहाँ यो वर्ष तेस्रो पटक हिमपात भएको हो ।
यसअघि कात्तिकमा सामान्य हिमपात भएको थियो । फक्ताङ्लुङ गाउँपालिका–६ लेलेपको घुन्सा, फले, वडा–७ ओलाङ्चुङगोला, याङ्मालगायत जिल्लाको हिमाली बस्तीमा हिउँ परेको घुन्साका छिरिङ टाँसी शेर्पाले बताए । हिमाली क्षेत्रमा अहिले हिमपात भइरहेको छ । ओलाङ्चुङगोलाकै याङ्मामा क्षेत्रमा हिउँ परेको छ । चार हजार दुई सय मिटर उचाइमा रहेको उच्च भेगको बस्तीमा हिउँ जमेको छ ।
तेह्रथुम, सङ्खुवासभासँगको सीमावर्ती क्षेत्र तथा मैवाखोला गाउँपालिकाको शिर तीनजुरे–मिल्के–जलजले क्षेत्रमा पनि हिमपात भएको छ ।मिक्वाखोला गाउँपालिका–५ पापुङ, सिदिङ्वा गाउँपालिकाको उच्च भागमा हिमपात भएको स्थानीयले बताए । हिमपात र वर्षा भएपछि किसान पनि हर्षित भएका छन् । मकैलगायत खाद्यान्न बाली लगाउने समयमा हिमपात र वर्षा हुँदा किसानले राहतको महसुस गरेका छन् ।
नगदे बाली अलैंची, तरकारीलगायतका बालीका लागि पनि हिउँ र वर्षाले राहत मिलेको छ । जिल्लाको उच्च स्थानीयमा हिमपात भएसँगै अध्यधिक चिसो बढ्को छ ।
