- ७ जेष्ठ २०८३, बिहीबार / May 21, 2026
काठमाडाैं । काठमाडौंको कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा जारी दोस्रो संस्करणको नेपाल प्रिमियर लिग (एनपीएल) अन्तर्गत आज दुई महत्वपूर्ण खेल हुँदै छन् ।
बिहान ११:१५ बजे हुने पहिलो खेलमा कर्णाली याक्स र लुम्बिनी लायन्स आमनेसामने हुनेछन् । लुम्बिनी रोहितकुमार पौडेल र कर्णाली सोमपाल कामीको कप्तानीमा मैदान उत्रिनेछन् । लुम्बिनी आज दोस्रो जितको खोजीमा छ । उसले पहिलो खेलमा चितवन राइनोजलाई पराजित गरेको थियो ।
त्यसैगरी कर्णालीका लागि पनि यो दोस्रो खेल हो । पहिलो खेलमा चितवनसँग हार भोगेको कर्णाली आजको खेलमा जीत निकाल्दै लिगमा पुनः लय समात्न चाहन्छ ।
त्यसैगरी दिउँसो ३:३० बजे सुरु हुने दोस्रो खेलमा काठमाडौं गोर्खाज र विराटनगर किङ्स भिड्नेछन् । करण केसीको कप्तानीमा रहेको काठमाडौं आज तेस्रो खेल खेल्दै छ ।
पहिलो खेलमा साविक विजेता जनकपुर बोल्ट्सलाई हराए पनि दोस्रो खेलमा सुदूरपश्चिम रोयल्ससँग पराजित हुँदै उसको लय बिग्रेको छ । उता सन्दीप लामिछानेको नेतृत्वमा रहेको विराटनगर लगातार दोस्रो जितको खोजीमा छ ।
विराटनगरले पहिलो खेलमा पोखरा एभेन्जर्सविरुद्ध उत्कृष्ट जीत दर्ता गरेको थियो ।
