उपेन्द्रको उपद्रो, ओलीभन्दा देउवाको साथ

काठमाडौं । समाजवादी मोर्चाको सदस्य रहेको जनता समाजवादी पार्टीका अध्यक्ष उपेन्द्र यादव स्वार्थका लागि एक वर्षमै मोर्चाबाट बाहिरिएका छन्।माओवादी केन्द्र, एकीकृत समाजवादी, बाबुराम भट्टराईको नेपाल समाजवादी पार्टी र नेत्रविक्रम चन्द नेतृत्वको नेकपा मिलेर समाजवादी मोर्चा बनेको थियो । तर ‘प्रचण्ड’ सत्तामा हुन्जेल निष्क्रिय रहेको यो मोर्चा अहिले तीब्र गतिमा सक्रिय हुँदा उपेन्द्र यादवले उपद्रो मच्चाउँदै बाहिरिएका छन् ।

समाजवादी मोर्चा छोडेनन् मात्रै उनी एमाले अध्यक्ष केपी शर्मा ओली नेतृत्वको सरकारको समर्थनमा समेत उभिएका छन् । असार ३० गते ओलीले सरकारको नेतृत्व लिए । तर वैशाख २३ गते पार्टी फुटाइदिएपछि प्रचण्डसँग रुष्ट यादवले त्यसयता मोर्चाको कुनै कार्यक्रममा भाग लिएनन् । यादव मोर्चामा नरहेको पुष्टि माओवादी केन्द्रका महासचिव देव गुरुङले गरेका थिए ।

जसपा अध्यक्ष यादव समाजवादी मोर्चा नाममात्रैको भएकाले यसबारे चर्चा गरेर समय बर्बाद गर्नुको अर्थ नहुने भन्दै तर्क नगर्न आग्रह गर्छन् । ओली र प्रचण्डका कारण पार्टी विभाजन भएको आक्षेप लगाउने उपेन्द्रले देउवासँग सहकार्यको संवाद जारी राखेका कांग्रेस नेताहरू बताउँछन् । गृहमन्त्री बन्नुअगाडि कांग्रेस प्रमुख सचेतक रमेश लेखकले उपेन्द्रले नयाँ सरकारलाई समर्थन गर्ने तर मन्त्रीमण्डलमा समावेश नहुने गरी तयार भएको बताएका थिए । उपेन्द्रलाई ओलीभन्दा देउवाले बढी साथ दिएको अभिव्यक्ति दिएका छन् ।