पश्चिम नवलपरासीस्थित विद्युत् पाेलमा बत्ती निभाउने क्रममा करेन्ट लागेर एकको मृत्यु

काठमाडौं । विद्युतको खम्बामा बल्दै गरेको बत्ती निभाउने क्रममा पश्चिम नवलपरासीमा करेन्ट लागेर एक जनाको मृत्यु भएको छ । रामग्राम नगरपालिका–७ बस्ने जयप्रकाश यादवलाई करेन्ट लागेर उपचारका क्रममा मृत्यु भएको हो ।

जिल्ला प्रहरी कार्यालयका सूचना अधिकारी एवम् प्रहरी नायब उपरीक्षक रेशम बोहराका अनुसार यादव आज बिहान ६ः०० बजे सोही वडाको उजैनीमा रहेको खम्बाको बत्ती निभाउन गएका थिए । सो क्रममा उनलाई करेन्ट लागेको हो । उनलाई उपचारका लागि पृथ्वीचन्द्र अस्पतालमा लगिएको थियो । अस्पतालका डाक्टरले उनलाई उपचारका क्रममा मृत्यु भएको घोषणा गरेका हुन्।

स्थानीयबासीका अनुसार उक्त स्थानमा वाइफाइलगायतका अन्य तार भुइँसम्म लत्रिएको अवस्थामा छ ।