- ३० चैत्र २०८२, सोमबार / Apr 13, 2026
काठमाण्डौ, २४ माघ । महाशिवरात्रि २०८२ को तयारीका लागि १७१ सदस्यीय मूल समारोह समिति गठन गरिएको छ । संस्कृति, पर्यटन तथा नागरिक उड्डयनमन्त्री एवं पशुपति क्षेत्र विकास कोष सञ्चालक परिषद्का अध्यक्ष अनिलकुमार सिन्हाको अध्यक्षतामा समिति गठन गरिएको हो ।
यस वर्षको महाशिवरात्रि पर्वलाई व्यवस्थित, सुरक्षित र भव्य रूपमा सम्पन्न गर्ने उद्देश्यसहित गठन गरिएको मूल समारोह समितिमा काठमाण्डौ महानगरपालिका वडा नं. ८ कार्यालयलगायत विभिन्न सरोकारवाला निकायका प्रतिनिधिलाई सदस्यका रूपमा समेटिएको छ ।
पशुपति क्षेत्रमा महाशिवरात्रि पर्वको सम्पूर्ण तयारी तथा व्यवस्थापनको जिम्मेवारी उक्त समितिले सम्हाल्ने पशुपति क्षेत्र विकास कोषले जनाएको छ । मूल समारोह समितिअन्तर्गत नौवटा विषयगत उपसमिति गठन गरी तयारीका काम अघि बढाइएको कोषका कार्यकारी निर्देशक एवं प्रवक्ता सुभाषचन्द्र जोशीले जानकारी दिनुभयो । उहाँका अनुसार पर्वलाई मर्यादित र सुरक्षित बनाउन प्रत्येक उपसमितिले आ–आफ्नो जिम्मेवारीअनुसार काम गरिरहेको छ ।
यसैबीच, मूल समारोह समितिअन्तर्गतको सुरक्षा उपसमितिको बैठक अस्ति शुक्रबार बसेको थियो । काठमाण्डौका प्रमुख जिल्ला अधिकारी ईश्वरराज पौडेलको अध्यक्षतामा बसेको उक्त बैठकमा नेपाली सेना, नेपाल प्रहरी, सशस्त्र प्रहरी बल तथा राष्ट्रिय अनुसन्धान विभागका अधिकारीहरूको उपस्थिति रहेको थियो ।
बैठकमा महाशिवरात्रि पर्वका क्रममा पशुपति क्षेत्रमा हुने भीड व्यवस्थापन, सुरक्षा चुनौती र आवश्यक सुरक्षा प्रबन्धबारे विस्तृत छलफल गरिएको प्रवक्ता जोशीले बताउनुभयो ।
