- २२ कार्तिक २०८३, आईतवार / Nov 8, 2026
काभ्रेपलाञ्चोक । प्रहरीले छब्बीस बाक्सा पटाका बरामद गरेको छ । बिपी राजमार्ग अन्तर्गत काभ्रेपलाञ्चोकको धुलिखेल नगरपालिका–९ काभ्रेभञ्ज्याङमा चेक जाँचका क्रममा पटाका बरामद गरेको हो ।
नियमित सवारीसाधन जाँचका क्रममा शनिबार बेलुका सिराहाबाट भुस्सा बोकेर काठमाडौँ आउँदै गरेको ना ५ ख ७१७९ नम्बरको ट्रकमा लुकाइछिपाई ल्याएको २६ बाक्सा पटाका बरामद गरिएको प्रहरीले जनाएको छ ।
जोकर लेखिएको प्रतिप्याकेटमा ८० का दरले पाँच बाक्सामा चार सय प्याकेट, हाईस्पेड स्पिनर चक्र लेखिएको प्रतिबाक्सा दुई सय ४० बण्डलका दरले पाँच बाक्सामा गरी एक हजार २०० प्याकेट र प्रतिप्याकेट १५ पिसका दरले ४८ प्याकेटको सिङ्गल रकेट लेखिएको दुई बाक्सा बरामद भएको प्रहरी नायब उपरीक्षक राजकुमार श्रेष्ठले बताए ।
खुर्सानी लेखिएको पटाका १४ बोरामा प्रतिबोरा १७–१८ का दरले जम्मा दुई सय ३९ बण्डल ९ प्रतिबण्डलमा ५० प्याकेट र प्रति प्याकेटमा २४ पिसका दरले गरी दुई लाख ८६ हजार आठ सय पिस बरामद गरिएको छ । ट्रकचालकको खोजी र थप अनुसन्धान भइरहेको प्रहरीले जनाएको छ ।
