- २६ असार २०८३, शुक्रबार / Jul 10, 2026
काठमाडौं, १२ जेठ । प्रधानमन्त्री बालेन्द्र शाहसँग युरोपेली सङ्घ (इयू) आबद्ध देशका गैरआवासीय राजदूत तथा मिसन प्रमुखहरूले सिंहदरबारमा सामूहिक भेटवार्ता गरेका छन् ।
प्रधानमन्त्री तथा मन्त्रिपरिषद्को कार्यालय, सिंहदरबारमा भएको भेटमा नेपाल र इयूबीचको द्विपक्षीय सम्बन्ध, विकास सहकार्य तथा समसामयिक अन्तर्राष्ट्रिय विषयमा छलफल भएको जनाइएको छ । प्रधानमन्त्री शाहकी प्रेस तथा अनुसन्धान विज्ञ दीपा दाहालका अनुसार भेटका क्रममा नेपालको वर्तमान प्राथमिकता, आर्थिक तथा विकास साझेदारी, अन्तर्राष्ट्रिय सहयोग र कूटनीतिक सहकार्यका विषयमा विस्तृत संवाद भएको थियो ।
भेटमा नेपाललाई अतिकम विकसित राष्ट्र (LDC) को समूहमा यथावत राख्न अन्तर्राष्ट्रिय समर्थन जुटाउने विषयमा समेत छलफल भएको स्रोतले जनाएको छ । साथै युरोपेली सङ्घको हवाई सुरक्षा सम्बन्धी ‘कालोसूची’ बाट नेपाललाई हटाउने विषयमा पनि पहल अघि बढाइएको बुझिएको छ । प्रधानमन्त्री शाहले नेपालले अन्तर्राष्ट्रिय समुदायसँग सहकार्यलाई थप प्रभावकारी बनाउँदै आर्थिक, पूर्वाधार र विकासका क्षेत्रमा साझेदारी विस्तार गर्न चाहेको धारणा राखेका थिए ।
यसअघि पनि प्रधानमन्त्री शाहले गत चैत २५ गते नेपालस्थित विभिन्न देशका राजदूत तथा कूटनीतिक नियोगका प्रमुखहरूसँग सामूहिक भेट तथा संवाद गरेका थिए ।
