- २२ असार २०८३, सोमबार / Jul 6, 2026
काठमाडौं, १४ भदौ । प्रधानमन्त्री केपी शर्मा ओली आज चीनको थियानजिन शहरमा पुगेका छन् । शाङ्घाई सहयोग संगठन (एससीओ) को शिखर सम्मेलनमा भाग लिन प्रधानमन्त्री चीन पुगेका हुन् ।
प्रधानमन्त्री ओली चीनका राष्ट्रपति सी चिनफिङको मैत्रीपूर्ण निमन्त्रणामा नेपाली प्रतिनिधिमण्डलको नेतृत्व गर्दै थियानजिन विनहाइ अन्तर्राष्ट्रिय विमानस्थलमा स्थानीय समयअनुसार दिउँसो ३:१५ बजे पुगेका हुन् । उनीसँगै नेपाल सरकारका उच्च अधिकारीहरू र अन्य प्रतिनिधिहरू पनि चीन पुगेका छन् । प्रधानमन्त्री ओलीले शिखर सम्मेलनका अवसरमा विभिन्न देशका राष्ट्राध्यक्ष र प्रमुखहरूसँग द्विपक्षीय भेटघाट गर्ने कार्यतालिका रहेकाे छ । यी भेटवार्तामा नेपाल र ती राष्ट्रहरू बीचका प्राथमिकताहरू र द्विपक्षीय सहकार्यका विषयमा छलफल हुने बताइएकाे छ।
यसका अतिरिक्त, प्रधानमन्त्री ओलीले आगामी सेप्टेम्बर २ मा चीनका उपराष्ट्रपति हान झेङसँग पनि भेटवार्ता गर्नेछन् । सो शिखर सम्मेलनमा प्रमुख नेताहरूसँग प्रधानमन्त्री ओलीको भेटवार्ता तय भइ सकेकाे बताइएकाे छ । जसमा रूसी महासङ्घका राष्ट्रपति भ्लादिमीर पुटिन, माल्दिभ्सका राष्ट्रपति डा मोहमद मिज्जु, कम्बोडियाका प्रधानमन्त्री डा सोमदेक मोहा, लाओसका प्रधानमन्त्री सोनेसाइ सिपानडोन र भियतनामका प्रधानमन्त्री फाम मिन चिङ लगायतका नेताहरू रहेका छन् ।
प्रधानमन्त्री ओलीसँग नेपाली प्रतिनिधिमण्डलमा उनकी धर्मपत्नी श्रीमती राधिका शाक्य, शिक्षा, विज्ञान र प्रविधि मन्त्री रघुजी पन्त, संस्कृति, पर्यटन र नागरिक उड्डयन मन्त्री बद्रीप्रसाद पाण्डे, नेपाली कांग्रेसका सांसद पूर्णबहादुर खड्का, आर्थिक तथा विकास सल्लाहकार डा युवराज खतिवडा र उच्चस्तरीय सरकारी अधिकारीहरू रहेका छन् ।
प्रधानमन्त्री ओली यहि भदौ १८ गते स्वदेश फर्कनेछन् ।
