प्रतिनिधिसभा विघटनविरुद्ध सर्वोच्चमा रिट निवेदन दर्ता

काठमाडौँ। सर्वोच्च अदालतको संवैधानिक इजलासमा प्रतिनिधिसभा विघटनसम्बन्धी रिट दर्ता गर्न मुख्य रजिष्ट्रारसमक्ष निवेदन पेश भएको छ। अधिवक्ता विमल पोखरेलले सर्वोच्चका मुख्य रजिष्ट्रार विमल पौडेललाई भेटेर आज निवेदन पेश गरेका हुन्।

रिटमा उल्लेख छ कि पूर्वप्रधानमन्त्री केपी शर्मा ओलीले राजीनामा दिइसकेको अवस्थामा पनि संविधानअनुसार सरकार गठन गर्ने विकल्पहरू रहँदै, राष्ट्रपति रामचन्द्र पौडेलबाट संविधानबमोजिम सरकार गठनको आह्वान नगरी, प्रतिनिधिसभाका सभामुख र सम्पूर्ण सदस्यहरूलाई कुनै जानकारी नदिई प्रतिनिधिसभा सदस्य नभएको व्यक्ति प्रधानमन्त्री नियुक्त गरिएको थियो।

उक्त नियुक्त व्यक्तिले जननिर्वाचित संसद् विघटन गर्न सिफारिस गरेको र सोही आधारमा राष्ट्रपतिबाट संसद् विघटन गर्दा गम्भीर राजनीतिक तथा संवैधानिक संकट उत्पन्न भएको रिटमा उल्लेख गरिएको छ। रिट दर्ता हुने वा नहुने बारे बाँकी रहेको सर्वोच्च प्रशासनले जनाएको छ।