- ३१ भाद्र २०८३, बुधबार / Sep 16, 2026
काठमाडौँ, २६ साउन । राष्ट्रिय स्वतन्त्र पार्टीका सभापति रवि लामिछानेको रिहाइ माग सम्बन्धी मुद्दा रुपन्देही जिल्ला अदालतका न्यायाधीश नारायण सापकोटाको इजलासमा पुगेको छ ।
बुटवलस्थित सुप्रिम सहकारी ठगी प्रकरणमा पुर्पक्षका लागि थुनामा रहेका लामिछानेले १९ साउनमा बैंक जमानतमार्फत रिहा गर्न माग गर्दै निवेदन दर्ता गरेका थिए । उनले बिगोबापत २ करोड ७४ लाख ८४ हजार रुपैयाँ दाखिला गरिदिएको दाबी गरेका छन् ।
गत चैत २२ गते उच्च अदालत तुलसीपुरको बुटवल इजलासले लामिछानेलाई पुर्पक्षका लागि थुनामा पठाउने आदेश दिएको थियो । त्यसयता उनी भैरहवा कारागारमा रहेका छन् ।
लामिछानेको निवेदनमा मुलुकी फौजदारी कार्यविधि संहिता, २०७४ को दफा ६८ अनुसार बैंक जमानत लिएर रिहा गर्न र दफा ७१ अनुसार थुनामुक्त गर्न माग गरिएको छ ।
