युद्धले गाजाको बैंकिङ प्रणाली पूर्ण रूपमा ध्वस्त, जनता ठूलो शुल्क तिरेर मात्र पैसा निकाल्न बाध्य

एजेन्सी । युद्धका कारण गाजाको बैंकिङ प्रणाली पूर्ण रूपमा ध्वस्त भएको छ । यसबाट स्थानीय बासिन्दालाई चरम आर्थिक संकटमा पारेको छ । यहाँका मानिसहरूले आफ्नो पैसा निकाल्न डिलरहरूलाई ठूलो शुल्क तिर्न बाध्य छन् ।

अक्टोबर ७, २०२३ मा इजरायली सैन्य अभियान सुरु भएदेखि गाजा पट्टी कडा नाकाबन्दीमा छ, जसले नगद आपूर्ति ठप्प बनाएको छ । नगद बिना आवश्यक सामान किन्न असम्भवजस्तै भएको छ । औपचारिक बैंकिङ सेवा बन्द हुँदा, गाजावासीहरूले आफ्नो पारिश्रमिक अनधिकृत मुद्रा परिवर्तकमार्फत अत्यधिक शुल्क तिरेर मात्र पाउने अवस्था छ ।

संयुक्त राष्ट्रसंघको प्रतिवेदनअनुसार, ९५% भन्दा बढी घरपरिवार गम्भीर आर्थिक कठिनाइमा छन् । नगद पाउनेहरूलाई पनि समस्या छ, किनभने धेरै व्यापारीहरूले जीर्ण नोट अस्वीकार गर्दै केवल नयाँ नोटहरू मात्र स्वीकार गरिरहेका छन् ।