गृहमन्त्री श्रेष्ठ र भौतिक पूर्वाधार मन्त्री ज्वालाको राजीनामा माग गर्दै सुर्खेत र दैलेखमा चक्का जाम

दैलेख । ललितपुरको बालकुमारीमा भएको आन्दोलनका क्रममा दैलेखका २१ वर्षीय सुजन राउत र अछामका वीरेन्द्र शाहको मृत्यु भएको घटनालाई लिएर आज सुर्खेत वीरेन्द्रनगर र दैलेखमा पुनः आन्दोलन चर्किएको छ ।

‘युवा विद्रोही’ समूहले दैलेख बजारबाट सुर्खेत तथा ग्रामिण भेगमा जाने सवारी साधन ठप्प पारेका छन । सुर्खेतमा पनि सवारी साधन ठप्प गर्दै राजधानीको मुख्य सडक चक्काजाम गरेका हुन । रत्न राजमार्ग अन्तर्गत एरिचोक–मंगलगढी चोकको अवस्था तनावग्रस्त छ ।

कुनैपनि सवारी साधनहरू चलिरहेका छैनन् । दिउँसो १२ बजेदेखि आन्दोलन सुरु हुँदा यातायातका साधन पुर्ण रुपले ठप्प भएका छन् । आन्दोलनकारीले गृहमन्त्री नारायणकाजी श्रेष्ठ र भौतिक पूर्वाधार मन्त्री प्रकाश ज्वालाको राजीनामा माग गरेका छन् । साथै मृतक युवाहरूलाई सहिद घोषणाको माग गरेका छन् ।