- १ कार्तिक २०८३, आईतवार / Oct 18, 2026
सिन्धुली । तीन वटा सहकारी ठगी प्रकरणमा मुछिएका फिक्कल गाउँपालिकाका उपाध्यक्ष राजु बरालमाथि पक्राउ पुर्जी जारी भएको छ । सुप्रिम, नाता र स्वर्णलक्ष्मी सहकारीको रकम हिनामिना गरेको आरोपमा उनलाई पक्राउ पुर्जी जारी भएको हो ।
तर सार्वजनिक कार्यक्रममै सक्रिय छन् । प्रहरीले कुनै कारबाही अघि बढाएको छैन । ठगीको फाइल प्रहरी वृत्त कालिमाटीबाट ल्याएर जिल्ला प्रहरी परिसर भद्रकाली काठमाडौंले अनुसन्धान अघि बढाउने क्रममा २४ जनाविरुद्ध काठमाडौं जिल्ला अदालतबाट पक्राउ पुर्जी जारी भएको थियो । सहकारी ठगी प्रकरणमा तीन चरणमा पक्राउ पुर्जी जारी भएको छ । पहिलो चरणमा प्रहरी वृत्त कालिमाटीकै अनुरोधमा सञ्चालक समितिका व्यक्तिहरुविरुद्ध २१ वैशाखमा पक्राउ पुर्जी जारी भएको थियो ।
दोस्रो चरणमा फिक्कल गाउँपालिकाका उपाध्यक्ष राजु बरालसहितका व्यक्तिविरुद्ध २ भदौमा पक्राउ पुर्जी जारी भयो । र अहिले तेस्रो चरणमा २ मंसिरमा रवि लामिछाने र छविलाल जोशीसहित गरी २६ जनाविरुद्ध पक्राउ पुर्जी जारी भइसकेको छ । पुर्जी जारी भएका मध्ये सुनिता नेवारलाई २० कात्तिकमा र कमल लामालाई २४ कात्तिकमा परिसरको टोलीले पक्राउ गरेर अनुसन्धान गरिरहेको छ ।
तर पक्राउ पुर्जी जारी भएका उपाध्यक्ष बराल भने अहिले पनि सार्वजनिक कार्यक्रममा सक्रिय छन् । विभिन्न कार्यक्रममा सहभागी भएको तस्वीर उनी आफैंले सामाजिक सञ्जालमार्फत सार्वजनिक गरेका छन् । उनीविरुद्ध प्रहरीले कारबाही अघि नबढाउनु रहस्यमय भएको स्थानीयहरुले बताएका छन् ।
एमालेबाट गाउँपालिका उपाध्यक्षमा निर्वाचित बराल जोडिएको स्वर्णलक्ष्मी सहकारीले १ अर्ब ११ करोड रुपैयाँभन्दा बढी रकम अपचलन गरेको आरोप छ । स्वर्णलक्ष्मी ठगी प्रकरणमा ६४५ बचतकर्ताले प्रहरीमा जाहेरी दिएका थिए । जाहेरी परेको ९ महिनापछि बल्ल प्रहरीले अनुसन्धान अघि बढाएको छ ।
