- १० श्रावण २०८३, आईतवार / Jul 26, 2026
काठमाडौं । राष्ट्रिय सभा अध्यक्षका लागि २८ उम्मेदवारी दर्ता गर्ने कार्यक्रम तय गरिएको छ ।
उपाध्यक्ष, दलका नेता तथा प्रमुख सचेतक एवं कार्यव्यवस्था तथा परामर्श समितिबीचको छलफलपछि उम्मेदवारी दर्ताको मिति तय भएको हो ।
दलका नेता तथा प्रमुख सचेतक एवं कार्य व्यवस्था तथा परामर्श समितिमा उपलब्ध सदस्यसँग छलफल गरी फागुन २८ सोमबार उम्मेदवारी दर्ता गर्ने सहमति भएको राष्ट्रिय सभाका उपाध्यक्ष उर्मिला अर्यालले बताइन् ।
समितिमा उपाध्यक्षसहित हाल पाँच जना सदस्य रहेका छन् । मतदान फागुन २९ गते मङ्गलबार हुने छ । फागुन २९ गते अध्यक्ष पदको निर्वाचन गर्ने सहमति भएको सङ्घीय संसद् सचिवालयका सहायक प्रवक्ता दशरथ धमलाले बताए। तालिकाबमोजिम नै निर्वाचन हुने भएको छ ।
फागुन २० गते राष्ट्रिय सभाका २० सदस्यको ६ वर्षे कार्यकाल सम्पन्न भएको थियो । रिक्त भएका २० मध्ये १९ सदस्य निर्वाचित भई शपथग्रहण गर्दै नियमित कामकारबाहीमा सहभागी भइसकेका छन् ।
२० मध्ये राष्ट्रिय सभाका अध्यक्ष गणेशप्रसाद तिमिल्सिनाको पदावधि पनि सकिएको थियो ।
