- ९ बैशाख २०८३, बुधबार / Apr 22, 2026
काठमाडौँ, १८ चैत्र । राष्ट्रियसभाले प्रतिनिधिसभाबाट सन्देशसहित प्राप्त चार प्रतिस्थापन विधेयक बहुमतले पारित गरेको छ।
राष्ट्रियसभाको आजको बैठकमा प्रधानमन्त्री केपी शर्मा ओलीका तर्फबाट सञ्चार तथा सूचना प्रविधिमन्त्री पृथ्वी सुब्बा गुरुङले प्रस्तुत गरेको ‘सुशासन प्रवर्धन तथा सार्वजनिक सेवा प्रवाह सम्बन्धी केही नेपाल ऐनलाई संशोधन गर्ने विधेयक, २०८१’ र भूमि व्यवस्था, सहकारी तथा गरिबी निवारण मन्त्री बलराम अधिकारीले पेश गरेको ‘सहकारी सम्बन्धी केही नेपाल ऐनलाई संशोधन गर्ने विधेयक, २०८१’ बहुमतले पारित भएका छन्।
यसैगरी, उपप्रधानमन्त्री तथा अर्थमन्त्री विष्णुप्रसाद पौडेलले प्रस्तुत गरेका ‘आर्थिक कार्यविधि तथा वित्तीय उत्तरदायित्व (पहिलो संशोधन) विधेयक, २०८१’ र ‘निजीकरण (पहिलो संशोधन) विधेयक, २०८१’ पनि पारित भएका छन्।
यी विधेयक सरकारले जारी गरेका अध्यादेशलाई प्रतिस्थापन गर्न गत माघ १८ गते संघीय संसद् सचिवालयमा दर्ता गराएको थियो। कानुनी व्यवस्थाअनुसार यी विधेयक आजसम्म दुवै सदनबाट पारित गर्नुपर्ने बाध्यता रहेकोले सोहीअनुरूप पारित गरिएको हो।
