- १५ भाद्र २०८३, सोमबार / Aug 31, 2026
काठमाडौं, १५ भदौ । भोटेकोशी नदीमा आएको विनाशकारी बाढीका कारण मुख्य सडक अवरुद्ध भएपछि रसुवा जोड्ने वैकल्पिक सडकमार्फत यात्रु तथा राहत सामग्री ढुवानी गर्न थालिएको छ ।
बाहुनबेसी–छाप–लच्याङ–सरम्थली–पार्टीखर्क–फलाको खोलापुल–घिचेट हुँदै धुन्चेसम्म पुग्ने वैकल्पिक सडक अहिले रसुवा आवतजावतको महत्वपूर्ण माध्यम बनेको छ । यस सडकबाट यात्रुसँगै राहत सामग्री बोकेका सवारीसाधन पनि सञ्चालन भइरहेका छन् ।
तर वैकल्पिक सडक साँघुरो, कच्ची तथा अत्यधिक चिप्लो भएकाले यात्रु र चालकले जोखिमपूर्ण यात्रा गर्नुपरेको छ । सडकमा एकपटकमा एउटा मात्रै सवारीसाधन सहज रूपमा गुड्न सक्ने अवस्था भएकाले विपरीत दिशाबाट गाडी आएमा बाटोमै जाम हुने गरेको छ ।
विशेषगरी उकालो सडकमा सवारीसाधनले पिकअप लिन नसक्दा समस्या हुने गरेको छ । राहत सामग्री बोकेका ठूला ट्रकहरू समेत उकालो चढ्न नसकेर बाटोमै रोकिने गरेका छन् । एउटा सवारीसाधन बिग्रिएमा त्यसको पछाडि रहेका अन्य गाडीसमेत लामो समय रोकिनुपर्ने अवस्था रहेको छ ।
कठिन सडकका कारण राहत सामग्री गन्तव्यसम्म पुर्याउनसमेत समय लागिरहेको छ । हालको अवस्थालाई ध्यानमा राख्दै वैकल्पिक सडकमा सडक सुधार, ग्राभेल तथा सवारी व्यवस्थापन आवश्यक देखिएको छ ।
बाढीपछि रसुवा सडक सञ्जालसँग पुनः जोडिए पनि वैकल्पिक मार्गको कठिन अवस्थाले यात्रु तथा राहत सामग्री ढुवानी गर्ने सवारीसाधनका लागि चुनौती कायमै रहेको छ ।
