भर्खरै : Sorry, your browser does not support inline SVG.
बङ्गलादेशमा राजनीतिक हिंसा चर्कियो, आगजनी र बम विस्फोटका घटनापछि १२४ जना पक्राउ | पोखरामा प्यारापाइलट उत्पादन गर्ने पहिलो स्कुल सञ्चालनमा, १ करोड ५० लाख लगानी | भक्तपुर नगरव्यापी विद्यालयस्तरीय खेलकुद प्रतियोगिता सुरु, ८४ विद्यालयका ३२ सयभन्दा बढी विद्यार्थी सहभागी | असोजमा महँगी ६.३७ प्रतिशत पुग्यो, घिउतेल र फलफूलको मूल्य सबैभन्दा धेरै बढ्यो | नक्कली शैक्षिक प्रमाणपत्र प्रयोग गरी बढुवा लिएको आरोपमा अनुसन्धान विभागका अधिकृतविरुद्ध मुद्दा | दुई महिनामा ८८७ व्यावसायिक फर्ममा अनुगमन, ७४ लाई कारबाही | असोजमा रेमिट्यान्सको ऐतिहासिक कीर्तिमान, एकै महिनामा भित्रियो २ खर्ब ६७ अर्ब | नेपाली सेनाको प्रवक्तामा सहायक रथी राजेन्द्र श्रेष्ठ नियुक्त |

भोटेकोशी बाढीपहिरो : सुरुङभित्र ३७ शव फेला, ११औँ दिन चिनियाँ नागरिकको जीवितै उद्धार

भोटेकोशी बाढीपहिरो : सुरुङभित्र ३७ शव फेला, ११औँ दिन चिनियाँ नागरिकको जीवितै उद्धार

काठमाडौँ, १३ कार्तिक । भोटेकोशी करिडोरमा आएको बाढीपहिरोबाट प्रभावित आयोजनाको सुरुङभित्र खोज तथा उद्धारका क्रममा ३७ वटा शव फेला परेको नेपाली सेनाले जनाएको छ । सुरुङभित्र अत्यधिक हिलो, पानी र अवरोध रहेकाले उद्धार कार्य निकै चुनौतीपूर्ण बनेको छ ।

नेपाली सेनाका सहायक रथी सुवासजंग थापाले भोटेकोशी एवं कालीगण्डकी करिडोर विपद्सम्बन्धी अध्ययन तथा अनुगमन संसदीय विशेष समितिको बैठकमा खोज तथा उद्धारको अवस्थाबारे जानकारी दिएका हुन् । उनका अनुसार उद्धार टोलीले घटनाको ११औँ दिन सुरुङभित्र फसेका एक चिनियाँ नागरिकलाई जीवितै उद्धार गर्न सफल भएको थियो । सुरुङको अवस्था अत्यन्तै जोखिमपूर्ण भए पनि नेपाली सेना, चिनियाँ तथा कोरियन टोलीको संयुक्त प्रयासमा उद्धार कार्य अघि बढाइएको थियो ।

९.७ किलोमिटर सुरुङभित्र उद्धारमा कठिनाइ

सहायक रथी थापाका अनुसार प्रभावित आयोजनाको सुरुङ ९.७ किलोमिटर लामो छ । सुरुङको नक्सा प्राप्त भएपछि इन्जिनियरहरूसँग समन्वय गरी खोज तथा उद्धारको योजना बनाइएको थियो । प्रारम्भिक निरीक्षणका क्रममा सुरुङभित्र प्रवेश गर्न सकिने दुईवटा सम्भावित स्थान मात्र फेला परेका थिए । अन्य प्रवेश मार्गहरू पूर्ण रूपमा अवरुद्ध थिए ।

उद्धार टोलीले सुरुङभित्र प्रवेश गर्दा अत्यधिक हिलो, साँघुरो बाटो र अक्सिजनको अभाव सामना गर्नुपरेको थियो । कतिपय स्थानमा कम्प्रेसर मेसिनको सहायताले अवरोध हटाएर खोजी अघि बढाइएको थियो । पावरहाउस क्षेत्रमा कार्यरत १२० देखि १३० जनामध्ये ११० जनालाई ४८ घण्टाभित्र हेलिकप्टरमार्फत उद्धार गरिएको सेनाले जनाएको छ ।

११औँ दिन चिनियाँ नागरिकको जीवितै उद्धार

सुरुङको माथिल्लो भागमा ढलानको काम भइरहेको स्थानबाट ११औँ दिन एक चिनियाँ नागरिकलाई जीवितै उद्धार गरिएको सहायक रथी थापाले जानकारी दिए ।उद्धार गरिएका व्यक्तिले सुरुङभित्र पानी जम्मा गरेर पिउने र हिँडडुल गर्दै समय बिताएको प्रारम्भिक जानकारी दिएका थिए । सेनाका अनुसार उद्धारका बेला उनी स्वस्थ अवस्थामा थिए । खोजीका क्रममा अडिट–३ बाट अस्ट्रेलियाली उद्धार टोलीको ड्रोन प्रयोग गरी सुरुङभित्र करिब १ हजार ७०० मिटर अगाडिसम्मको अवस्था अध्ययन गरिएको थियो ।

हेडवर्क क्षेत्रमा ३७ शव फेला

सेनाका अनुसार सुरुङको हेडवर्क क्षेत्रमा ठूला मेसिन, मिक्सर, एक्स्काभेटर र ट्रकहरू थुप्रिएको अवस्थामा भेटिएका थिए । सोही क्षेत्रमा खोजीका क्रममा ३७ वटा शव फेला परेका हुन् ।

सुरुङको करिब चार किलोमिटर क्षेत्रमा पानी र लेदो जमेको छ । करिब २१ फिट अग्लो सुरुङमा १७ फिटसम्म पानी र लेदो भरिएको जानकारी दिँदै सहायक रथी थापाले त्यसभन्दा अगाडिको क्षेत्रमा पुग्न कठिन रहेको बताए । अडिट–१ क्षेत्रबाट पानी निकाल्ने विकल्पबारे आयोजना र इन्जिनियरिङ टोलीसँग छलफल भइरहेको छ ।

उद्धारमा ४२ सैनिक परिचालन

भोटेकोशी करिडोरको प्रभावित क्षेत्रमा नेपाली सेनाका ४२ जना जनशक्ति परिचालन गरिएको छ । नेपाली, भारतीय, चिनियाँ र कोरियन कामदार कार्यरत रहेको आयोजनामा बाढीपहिरोले ठूलो क्षति पुर्‍याएको छ । सुरुङभित्रको अवस्था जटिल रहेकाले खोज तथा उद्धार कार्य अझै जारी रहेको सेनाले जनाएको छ ।

 


Thali Mobile Pvt.Ltd.