रौतहटमा बोक्सीको आरोपमा महिला कुटपिट, ७ जना विरुद्ध जाहेरी

रौतहट, २२ भाद्र । रौतहटको गरुडा नगरपालिका–८ बसबिट्टी जिङ्गडियामा ५५ वर्षीया सुशीला देवीलाई छिमेकीहरूले बोक्सीको आरोप लगाउँदै सामूहिक कुटपिट र अमानवीय व्यवहार गरेको घटना सार्वजनिक भएको छ।

आइतबार दिउँसो दिनेश साह कानु (४०), उनका छोरा गोलु साह कानु (२२) र विक्रम साह कानु (३५) लगायतले सुशीला देवीमाथि कुटपिट गरेका हुन्। दिनेश साह कानुकी श्रीमती संगीता देवी (३७) अकस्मात बिरामी भई गरुडास्थित रोमा अस्पतालमा उपचार सम्भव नभएपछि वीरगन्ज लैजाने क्रममा बाटैमा मृत्यु भएपछि मृतकका परिवारजनले सुशीला देवीमाथि टुनामुना गरेको आरोप लगाएका थिए।

आरोपपछि सुशीला देवीलाई कुटपिट मात्र नभई केश मुण्डन गरी अपमानजनक व्यवहार गरिएको पीडित पक्षले जनाएको छ। घटनाबारे जानकारी पाएलगत्तै दिउँसो करिब ३ बजे प्रहरी टोली घटनास्थल पुगेर पीडितलाई उद्धार गरेको थियो। तर संलग्न तीनै जना घटनास्थलबाट फरार भएको इलाका प्रहरी कार्यालय गरुडाले जनाएको छ।

पीडित परिवारले दोषीलाई तत्काल पक्राउ गरी कडा कारबाही गर्न माग गर्दै प्रहरीमा जाहेरी दर्ता गराएको छ। इलाका प्रहरी कार्यालय गरुडाका प्रमुख तथा डीएसपी राजन कार्कीका अनुसार बोक्सीको आरोपमा कुटपिट गर्ने ७ जनामाथि जाहेरी परेको छ। आरोपितहरूले महिलामाथि कुटपिट र केश मुण्डन गरेको पुष्टि भएको र यसबारे थप अनुसन्धान भइरहेको उनले जानकारी दिएका छन्।