- २२ कार्तिक २०८३, आईतवार / Nov 8, 2026
काठमाडौँ, १० पुष । नेपाल रेडक्रस सोसाइटीले विधान महाधिवेशन सम्पन्न नहुँदासम्म दीर्घकालीन असर पर्ने कुनै पनि कार्य नगर्न मातहतका सबै निकायलाई निर्देशन दिएको छ।
सोसाइटीको केन्द्रीय तदर्थ समितिले संस्थाको नियमित तथा अत्यावश्यक सेवा सञ्चालनबाहेक दीर्घकालीन प्रभाव पार्ने निर्णय तथा गतिविधि नगर्न आग्रह गरेको हो।
यसअनुसार नयाँ सामान खरिद, निर्माण कार्य, स्थायी कर्मचारी नियुक्ति, सरुवा, बढुवा लगायतका निर्णय तत्कालका लागि रोक्न अनुरोध गरिएको छ। निर्देशन नेपाल रेडक्रस सोसाइटीका सबै प्रदेश कार्यालय, जिल्ला शाखा, आँखा अस्पताल तथा विभागहरूलाई लागू हुने जनाइएको छ।
समितिले विधान महाधिवेशन नहुञ्जेल संस्थागत स्थायित्व र पारदर्शिता कायम राख्न यस्तो निर्णय लिएको जनाएको छ। गत पुस ३ गते बसेको केन्द्रीय तदर्थ समितिको बैठकले रेडक्रस सोसाइटीको विधानमा अठारौँ संशोधनका लागि यही पुस २५ गते विधान महाधिवेशन आयोजना गर्ने निर्णय गरिसकेको छ।
