जरिवाना नबुझाएका ६ राजनीतिक दलको दर्ता खारेज

काठमाडौँ, १० पुष । निर्वाचन आयोगले तोकिएको जरिवाना नबुझाएका छ वटा राजनीतिक दलको दर्ता खारेज गरेको छ।

आयोगले राजनीतिक दलसम्बन्धी ऐन, २०७३ को दफा ५४ को उपदफा (४) बमोजिम जरिवाना नतिरेका दललाई सोही ऐनको दफा १२ अनुसार खारेज गर्ने निर्णय गरेको जनाएको छ।

निर्वाचन आयोगका अनुसार खारेज हुने दलहरूमा आम आदमी पार्टी नेपाल, नेपाल कम्युनिष्ट पार्टी (लोकतान्त्रिक), नेपाल राष्ट्रवादी पार्टी, आधुनिक नेपाल समाजवादी पार्टी, नेपाल कम्युनिष्ट पार्टी (गौरवशाली) र माओवादी जनमुक्ति पार्टी रहेका छन्।

दलहरू लामो समयसम्म पनि कानुनबमोजिम तोकिएको जरिवाना नबुझाएको पाइएपछि दर्ता खारेज गरिएको आयोगले स्पष्ट पारेको छ।छ वटा दलको दर्ता खारेज भएसँगै हाल निर्वाचन आयोगमा दर्ता भएका राजनीतिक दलको सङ्ख्या १३७ पुगेको छ।