- ५ असार २०८३, शुक्रबार / Jun 19, 2026
काठमाडौँ, ३१ असाेज । सडक र पुल निर्माणका लागि ठेक्का सम्झौता गरी काम नगरेर वर्षौंदेखि अलपत्र पारिएका रुग्ण ठेक्का तोड्ने प्रक्रिया सुरु भएको छ । सडक विभागअन्तर्गत हुलाकी सडक निर्देशनालय, सङ्घीय सडक सुपरिवेक्षण तथा अनुगमन कार्यालय काठमाडौँ र इटहरी मातहतका सडक डिभिजन कार्यालयहरूले १७ वटा रुग्ण ठेक्का तोड्ने प्रक्रिया अगाडि बढाएका छन् ।
सडक डिभिजन कार्यालय विराटनगर, चन्द्रनिगाहपुर र निर्देशनालयले पाँच/पाँच र नुवाकोटले २ वटा ठेक्का तोड्ने तयारी गरेका छन् । ठेक्का तोड्ने प्रक्रियामा अधिकांश पुल निर्माणका परियोजनाहरू छन् । ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकास मन्त्री कुलमान घिसिङले ठेक्का लिने तर काम नगर्ने र आयोजना अलपत्र पार्ने प्रवृत्ति अन्त्यका लागि मातहतका निकायलाई निर्देशन दिएका थिए । सडकअन्तर्गत २५८ ठेक्का रुग्ण अवस्थामा छन् ।
सबैभन्दा ठुलो ठेक्का झापाको कन्काई पुलको छ, जुन झापा गाउँपालिका–२ र गौरीगञ्ज गाउँपालिका–१ जोड्ने करिब ७२३ मिटर लामो छ । हुलाकी राजमार्ग निर्देशनालयअन्तर्गत आर्थिक वर्ष २०६७/६८ मा पप्पु–महादेवखिम्ती संयुक्त उपक्रमसँग ठेक्का सम्झौता भएको थियो, तर १४ वर्षमा भौतिक र वित्तीय प्रगति करिब ५५ प्रतिशत मात्र भएको छ । मन्त्री घिसिङले स्थानीय बासिन्दालाई यसमा छिट्टै निर्णय हुने जानकारी दिएका थिए ।
ठेक्का तोड्न लागिएका परियोजनामा पटक-पटक म्याद थप भए पनि ठेकेदारले कार्य सम्पन्न गर्न चासो नदेखाएको र निर्माण कार्य अधुरो छ भन्ने कारणले ठेक्का सम्झौता उल्लङ्घन भएको बताइएको छ । सार्वजनिक सूचना अनुसार, ठेकेदारहरूले १५ दिनभित्र संशोधित कार्यतालिका, स्रोत साधन परिचालन योजना र कार्य सम्पन्न गर्ने प्रतिबद्धता पेश गर्नुपर्नेछ, नभए ठेक्का तोडेर कालोसूचीमा राखिने र जमानत रकम जफत हुने व्यवस्था गरिएको छ ।
