सैनिकमञ्चको संविधान दिवस

काठमाडौं । सैनिकमञ्च टुँडिखेलमा आज विशेष समारोहकाबीच संविधान दिवस मनाइएको छ । मूल समारोहमा राष्ट्रपति रामचन्द्र पौडेल प्रमुख अतिथिका रूपमा सहभागी भएका थिए । समारोह समितिका अध्यक्ष एवं प्रधानमन्त्री केपी शर्मा ओली लगायतका विशिष्ट अतिथिहरुको सहभागीता रहेको थियो ।

नेपाली सेना, नेपाल प्रहरी, सशस्त्र प्रहरी लगायत विभिन्न साँस्कृतिक झाँकीहरु प्रस्तुत गरिएको थियो । शान्तिको प्रतीक सेतो परेवा उडाइएर संविधान दिवस मनाइएको हो । सो अवसरमा आजै साँझ राष्ट्रपति पौडेलले शीतल निवासमा एक कार्यक्रम आयोजना गरेका छन् । साथै नारायणहिटी दरबार अगाडि सडकमा आज साँझ सांगीतिक कार्यक्रम आयोजना गरिएको छ ।

यी कार्यक्रमहरुमा प्रधानमन्त्री केपी शर्मा ओली पनि सहभागी हुने प्रधानमन्त्रीको सचिवालयले जनाएको छ । जनताको सातदशक लामो संघर्ष, बलिदान र जनआन्दोलनको उपलब्धिका रूपमा गठन भएको संविधानसभाबाट २०७२ साल असोज ३ गते संघीय लोकतान्त्रिक गणतन्त्र नेपालको संविधान जारी भएको थियो । सोही दिनको स्मरणमा सरकारले ३ असोजलाई संविधान दिवस तथा राष्ट्रिय दिवस मनाउने गर्दछ ।

दिवसका अवसरमा राष्ट्रपति, उपराष्ट्रपति, प्रधानमन्त्री, सभामुख, राष्ट्रियसभा अध्यक्ष तथा विभिन्न पार्टीका शीर्ष नेताहरुले शुभकामना सन्देशमार्फत उल्लासमय वातावरणमा राष्ट्रिय दिवस भव्य रूपमा मनाउन आह्वान गरेका छन् । सरकारले संविधान दिवसका अवसरमा राष्ट्रिय झण्डा फहराउन र घरघरमा दीपावली गर्न आह्वान गरेको छ ।