- ३० चैत्र २०८२, सोमबार / Apr 13, 2026
काठमाडौं, २० फागुन । प्रतिनिधि सभा सदस्य निर्वाचनका लागि सरकारले सार्वजनिक बिदा घोषणा गरे पनि सार्वजनिक बिदामा बैंक सेवा भने पूर्ण रूपमा बन्द नहुने भएको छ । अत्यावश्यक वित्तीय कारोबारलाई निरन्तरता दिन अधिकांश वाणिज्य बैंकहरूले तोकिएका शाखामार्फत सीमित समयका लागि सेवा उपलब्ध गराउने भएका हुन् ।
फागुन २०, २१ र २२ गते सार्वजनिक बिदा परे पनि अर्थतन्त्रसँग जोडिएका आधारभूत गतिविधि सञ्चालनमा राख्न राष्ट्र बैंकले बैंकहरूलाई आंशिक रूपमा सेवा दिन निर्देशन दिएको थियो । विशेषगरी सरकारी राजस्व संकलन, उम्मेदवार तथा राजनीतिक दलका निर्वाचन खर्चसम्बन्धी कारोबार र दैनिक नगद आवश्यकतासँग सम्बन्धित सेवा बन्द हुँदा समस्या आउन सक्ने भएकाले सेवा सञ्चालन गर्न भनिएको हो ।
राष्ट्र बैंकको निर्देशनअनुसार २० वाणिज्य बैंकमध्ये स्ट्याण्डर्ड चार्टर्ड बैंक, नेपाल बैंक र राष्ट्रिय वाणिज्य बैंक बाहेक अधिकांश बैंकहरूले निर्वाचन बिदाका दिन तोकिएका शाखा खुला राख्ने सूचना जारी गरेका छन् । सिद्धार्थ बैंकले भने होलीडे काउन्टर बन्द रहने जनाएको छ ।
नबिल बैंकले कोशी प्रदेशका विराटनगर, बिर्तामोड, धरान, इटहरी र दमक शाखा सञ्चालन गर्ने जनाएको छ । मधेशमा वीरगन्ज र जनकपुर पिडारीचोक, गण्डकीमा पोखरा, लुम्बिनीमा बुटवल, भैरहवा र नेपालगञ्ज, सुदूरपश्चिममा धनगढी तथा कर्णालीमा सुर्खेत शाखा खुला रहनेछन् । बागमती प्रदेशमा तीनधारा, ललितपुर, न्यूरोड, बिजुलीबजार, कुमारीपाटी, बौद्ध, महाराजगञ्ज, कौशलटार, नारायणगढ र हेटौँडा शाखाबाट सेवा उपलब्ध हुनेछ ।
प्रभु बैंकले बबरमहलस्थित मुख्य कार्यालयसहित जनकपुर, पोखरा (रत्नचोक), इटहरी, कमलादी, विराटनगर, वीरगन्ज, ललितपुर, भक्तपुर, भैरहवा, नेपालगञ्ज, धनगढी र थानकोट शाखा सञ्चालनमा रहने जनाएको छ ।
नेपाल इन्भेष्टमेन्ट मेगा बैंकले विराटनगर, वीरगन्ज, जनकपुर, दरबारमार्ग, सिपाडोल, पुल्चोक, ठमेल, पोखरा, बुटवल, नेपालगञ्ज, सुर्खेत र धनगढी शाखाबाट सेवा दिनेछ ।
कृषि विकास बैंकले बिहान १०:०० देखि दिउँसो १:३० बजेसम्म विभिन्न शाखा खुला राख्ने जनाएको छ । कञ्चनबारी, धरान, बर्दिबास, सिमरा, जोरपाटी, लगनखेल, रत्नपार्क, नारायणगढ, हेटौँडा, पोखरा, पालुङटार, भैरहवा, कोहलपुर, सुर्खेत, धनगढी र दोधाराचाँदनी शाखाबाट सेवा उपलब्ध हुनेछ ।
नेपाल एसबीआई बैंक, एनआईसी एशिया बैंक र ग्लोबल आइएमई बैंकले पनि देशभरका तोकिएका शाखा खुला राख्ने जानकारी दिएका छन् । सातै प्रदेशका मुख्य शाखाबाट सार्वजनिक बिदामा बैंक सेवा उपलब्ध गराइने सम्बन्धित बैंकहरूले जनाएका छन् ।
