२१ प्रहरी कर्मचारीलाई हाजिर हुन सात दिनको अल्टिमेटम

काठमाडौं, ११ जेठ । नेपाल प्रहरीले सम्पर्कविहीन रहेका आफ्ना २१ जना प्रहरी कर्मचारीलाई सात दिनभित्र हाजिर हुन निर्देशन दिएको छ। प्रहरी प्रधान कार्यालय, नक्सालबाट मंगलबार जारी सूचनामा, ती कर्मचारीहरू बिना जानकारी अनुपस्थित रहेको र खोजतलास गर्दा पनि सम्पर्कमा नआएको उल्लेख गरिएको छ।

सूचनामा भनिएको छ, “प्रहरी नियमावली, २०७१” को नियम ११५ (२) अनुसार प्रक्रिया पूरा गरी सूचना टाँस भइसकेको भए पनि उनीहरू कार्यालयमा सम्पर्कमा आएका छैनन्। अब सूचनापछि सात दिनभित्र गैरहाजिर रहनुको कारण खुलाउँदै सन्तोषजनक स्पष्टीकरण सहित उपस्थित हुन भनिएको छ।

निर्धारित समयमा हाजिर नभएमा नियम ११३ (१०) को खण्ड (च) अनुसार सेवाबाट हटाउने कारबाही अगाडि बढाइने प्रहरीको चेतावनी छ।