- २६ भाद्र २०८३, शुक्रबार / Sep 11, 2026
काठमाडौं । पूर्व सञ्चार तथा सूचना प्रविधिमन्त्री एवं दाङ क्षेत्र नम्बर २ का प्रतिनिधिसभा सदस्य रेखा शर्मालाई पितृशोक परेको छ । बुवा दाङका बरिष्ठ साहित्यकार गिरिराज शर्माको आज ८४ वर्षको उमेरमा निधन भएको हो ।
भैरहवास्थित निवासमा बसोबास गर्दै आएका शर्मालाई आज विहान स्वास्थ्यमा समस्या देखिएपछि गौतमबुद्ध मुटु अस्पताल बुटवल लगिएको थियो । उनको दिउँसो सवा ३ बजे निधन भएको अस्पतालले जनाएको छ । शर्माको पार्थिक शरीर आज साँझ घोराही १८ मसिनास्थित निवासमा पुर्याएर अन्तिम श्रद्धाञ्जलीका लागि राखिने पारिवारिक स्रोतले जनाएको छ । अन्त्येष्टि भोलि विहान ८ बजे मसिना सतीघाट कटुवाखोलामा गरिने ज्वाई कृष्णध्वज खड्काले जानकारी दिए ।
शर्माको विसं १९९७ साल जेठ १५ गते जन्म भएको थियो । प्रगतिशील साहित्यिक आन्दोलनमा ऐतिहासिक एवं नेतृत्वदायी भूमिका निर्वाह गरेका बरिष्ठ साहित्यकार शर्माका झण्डै एक दर्जन कृति प्रकाशित छन् । सयौं कविता पत्रपत्रिकामा प्रकाशित छन् । चार छोरी र एक छोरा छन् । शर्माको जन्म विसं १९९७ साल जेठ १५ गते भएको थियो । श्रीमति पार्वतादेवी पौडेलको २०७७ चैत ९ गते निधन भएको थियो ।
