सप्तरीमा डाँका समूहसँगको झडपमा एकजनाको मृत्यु, एक घाइते

काठमाण्डौ, २३ जेठ ।  सप्तरीमा लुटपाट गर्न गएका डाँका समूहको प्रतिकार गर्दा एक जनाको मृत्यु भएको छ भने अर्का एकजना घाइते भएका छन्। सुरुङ्गा नगरपालिका–८ मल्हनवाका कान्तालाल चौधरीको डाँका समूहले चलाएको गोली लागेर ज्यान गएको जिल्ला प्रहरी कार्यालय सप्तरीले जनाएको छ।

उनका भाइ रामाकान्त चौधरी घाइते भई प्रादेशिक अस्पताल लहानमा उपचाररत छन्। गएराति झन्डै १ बजेतिर ४–५ जनाको डाँका समूह चौधरीको घरमा लुटपाट गर्न प्रवेश गरेको थियो। प्रतिकार गर्ने क्रममा डाँकाहरूले धारिलो हतियार प्रयोग गर्दा कान्तालाल घाइते भए। त्यसपछि उनीमाथि गोली प्रहार गर्दा घटनास्थलमै ज्यान गएको प्रहरीले जनाएको छ।

डाँका समूहले घरबाट पाँच तोला सुन, दुई किलो चाँदी र ६० हजार नगद लुटपाट गरेको छ। घटनास्थलबाट प्रहरीले नपड्किएको तीन राउन्ड गोली र एक राउण्ड गोलीको खोका बरामद गरेको छ।